পৰিবহণ বিভাগৰ নিৰ্দেশনাক অঙ্গুষ্ঠ চিটি বাছ চালকৰ

নিৰ্দেশনাসমূহক সমূলি আওকান কৰি পূৰ্বৰ দৰেই চলি থাকিল মহানগৰীৰ চিটি বাছ

গুৱাহাটী, 27 মাৰ্চ: শেহতীয়াকৈ, কামৰূপ মহানগৰীৰ পৰিবহণ বিভাগে মহানগৰীৰ চিটি বাছসমূহক লৈ কেইবাটাও নিৰ্দেশনা জাৰি কৰিছিল ৷ পিছে, কাগজে কলমেহে কেৱল সীমাবদ্ধ থাকিল পৰিবহণ বিভাগৰ এই নিৰ্দেশনাসমূহ ৷ পূৰ্বৰ দৰেই চলি থাকিল মহানগৰীত চিটিবাছ ৷

কামৰূপ মহানগৰ জিলা পৰিবহণ বিভাগৰ নিৰ্দেশনা জাৰি কৰাৰ এটা মাহ অতিক্ৰম হোৱাৰ পাচতো গুৰুত্বহীন হৈ পৰি থাকিল সকলোবোৰ নীতি-নিৰ্দেশনা ৷ বিশেষকৈ শেহতীয়াকৈ পৰিবহণ বিষয়া বাপন কলিতাই ঘোষনা কৰা নিৰ্দেশনা অনুসৰি 15 মিটাৰ দূৰৈৰ পৰাই দেখা পোৱাকৈ চালকৰ ফটো সংলগ্ন কৰা থাকিব লাগিব চিটি বাছসমূহত ৷ পিছে এই নিৰ্দেশনাক আওকাণ চিটি বাছ চালকে বেগতহে ভৰাই আনে নিজৰ ফটো ৷

ইয়াৰোপৰি, যাত্ৰীৰ সুৰক্ষাৰ প্ৰতি লক্ষ্য ৰাখি চিটিবাছসমূহত হেণ্ডিমেন থাকিব নোৱাৰিব বুলিও নিৰ্দেশনা জাৰি কৰিছিল ৷ বিশেষকৈ এই নিয়মৰ বিৰুদ্ধে বিগত সময়চোৱাত চালকসকলে কৰা প্ৰতিবাদৰ পাচতো সিদ্ধান্ত সলনি কৰা নাছিল পৰিবহণ বিভাগে ৷ কিন্তু নিজৰ মতত অটল চালকসকলে বিভাগক অঙ্গুষ্ঠ দেখুৱাই হেণ্ডিমেন সহিতেই বাছ চলাচল অব্যাহত ৰাখিছে গুৱাহাটী মহানগৰীত ৷

পৰৱৰ্তী সময়ত পৰিবহণ বিভাগে এইক্ষেত্ৰত কেনেধৰণৰ পদক্ষেপ ল’ব সেয়াহে লক্ষণীয় হ’ব ৷