11 বজাৰ দহটা শীৰ্ষ খবৰ

11 বজাৰ দহটা শীৰ্ষ খবৰ

সেৱা আৰম্ভ হোৱাৰ ডেৰ মাহৰ পিছতে বন্ধ হোৱাৰ দিশে মাজুলী-অফলামুখ ফেৰীঘাটৰ ৰ’পেক্স ফেৰী সেৱা ৷ ৰ’পেক্সৰ 11 গৰাকী কৰ্মচাৰীক দৰমহা নিদিয়াৰ প্ৰতিবাদতে বন্ধ কৰা হ’ব ফেৰী সেৱা ৷

বাংলাদেশত হিন্দুৰ ওপৰত চলা আক্ৰমণৰ বিৰুদ্ধে ৰাজ্যতো চলিছে প্ৰতিবাদ ৷ কোকৰাঝাৰতো এনে অমানৱীয় আক্ৰমণ আৰু অত্যাচাৰৰ বিৰুদ্ধে শুকুৰবাৰে প্ৰতিবাদ সাব্যস্ত কৰে ৰাষ্ট্ৰীয় জনকল্যাণকাৰী পৰিষদৰ অসম ৰাজ্যিক সমিতিয়ে ৷ কোকৰাঝাৰ চহৰৰ সুভাষপল্লিস্থিত মহেশ মন্দিৰ প্ৰাংগণত পৰিষদৰ কোকৰাঝাৰ জিলা সমিতিৰ উদ্যোগত প্ৰতিবাদী কাৰ্যসূচীখনি ৰূপায়ণ কৰা হয় ৷

চিৰাঙত দুটাকৈ হাতী দাঁতৰ সৈতে গ্ৰেপ্তাৰ এজন লোক ৷ বন বিভাগ আৰু SSB এ যুটীয়াভাৱে চলাইছিল অভিযান ৷

বৰপেটাত অব্যাহত থকা কাঠৰ অবৈধ সৰবৰাহৰ লগতে জিলাখনত মুখ্যমন্ত্ৰীৰ অন্ন সুৰক্ষা যোজনাৰ চাউলৰ চোৰাং ব্যৱসায় বন্ধ কৰাৰ দাবীত শুকুৰবাৰে বৰপেটা জিলা ছাত্ৰ সন্থাই এক সংবাদমেলৰ আহ্বান কৰে ৷

শিৱসাগৰ নগৰত আহোম সেনাৰ উদ্যোগত প্ৰতিবাদী কাৰ্যসূচী ৰূপায়ণ ৷ আহোম সেনাৰ শিৱসাগৰ জিলা সমিতিয়ে দেশৰ সামগ্ৰিক মূল্যবৃদ্ধি আৰু আহোম জনগোষ্ঠীক জনজাতিকৰণৰ দাবীত শুকুৰবাৰে নগৰৰ মুক্তিনাথ চাৰিআলিত এক অভিনৱ প্ৰতিবাদ সাব্যস্ত কৰে ৷

পৌৰাণিক অস্ত্ৰ শস্ত্ৰৰে সজ্জিত নগাঁও আৰক্ষী । হাতত ধনু কাঁড়, গদা ল’লে এছ পি আনন্দ মিশ্ৰই । নগাঁৱত আৰক্ষীৰ অন্য এক ৰূপ । হাতত অত্যাধুনিক মাৰণাস্ত্ৰ নহয়, পৌৰাণিক অস্ত্ৰ-শস্ত্ৰৰে সু সজ্জিত হৈ যুদ্ধত ব্যস্ত নগাঁও আৰক্ষী ।

আজি দক্ষিণৰ জনপ্ৰিয় অভিনেতা প্ৰভাষৰ জন্মদিন ৷ গ্ল’বেল তাৰকাগৰাকীৰ জন্মদিন উপলক্ষে ইনষ্টাগ্ৰামে ‘Global Prabhas Day’ বুলি মুকলি কৰিছে এটি নতুন ইনষ্টাগ্ৰাম ফিল্টাৰ ৷

ৰাজস্থানৰ বৰহাথ পৰিয়ালে ব্ৰিটিছক ভাৰতৰ পৰা খেদি পঠিয়াবলৈ বিপ্লৱৰ পথত খোজ দিছিল । এয়া হৈছে এগৰাকী পিতৃ, পুত্ৰ আৰু ভাতৃৰ কাহিনী যিয়ে ৰাজস্থান আৰু মধ্য প্ৰদেশৰ কেতবোৰ স্থানত ৰাইজৰ মাজত বিপ্লৱী সত্ত্বা জগাই তুলিবলৈ লোকগীত পৰিৱেশন কৰিছিল । লগতে ব্ৰিটিছৰ বিৰুদ্ধে নিজৰ স্থিতি স্পষ্ট কৰি বিভিন্ন কাৰ্য সংঘটিত কৰিছিল আৰু বিপ্লৱৰ বীজ ৰোপণ কৰিছিল । গোটেই পৰিয়ালটোৱে ভাৰতৰ স্বাধীনতাৰ কাৰণে তেওঁলোকৰ জীৱন উৎসৰ্গা কৰিছিল ।

নগাঁৱৰ এঘাৰ মাইলত সংঘটিত হয় ভয়ংকৰ পথ দুৰ্ঘটনা ৷ অভাৰটেক কৰিবলৈ গৈ এখন ট্ৰাকে খুন্দা মৰাত ৩৬ নং ৰাষ্ট্ৰীয় ঘাইপথৰ ওপৰতে বাগৰি পৰে কয়দী কঢ়িওৱা এখন বাহন ৷ 8 জন কয়দীক কঢ়িয়াই আনিছিল বাহনখনে ৷ আৰক্ষীৰ লগতে গুৰুতৰভাৱে আহত হয় কয়দী কেইজন ৷ ইপিনে দুজনক সংকটজনক অৱস্থাত উন্নত চিকিৎসা বাবে নগাঁৱলৈ প্ৰেৰণ কৰা হৈছে ৷ দুৰ্ঘটনাগ্ৰস্ত বাহন দুখনৰ নম্বৰ AS-30-7558 আৰু NL-01AA-7575 ।

হিমন্ত বিশ্ব শৰ্মাৰ নিৰ্বাচনী প্ৰচাৰৰ পিছতে থাওৰাত অখিল গগৈৰ বাইক ৰেলীৰে চমক ৷ থাওৰাত ৰাইজৰ দলৰ কৰ্মীৰ ওপৰত আক্ৰমণ কৰাৰ গুৰুতৰ অভিযোগ উত্থাপন কৰিছে অখিল গগৈয়ে ৷