শিলচৰত সন্দেহজনক ৰহিংগীয়া আটক

চূড়ান্ত ৰাষ্ট্ৰীয় নাগৰিকপঞ্জী প্ৰকাশৰ পূৰ্বে শুকুৰবাৰে নিশা শিলচৰত আটক এগৰাকী ৰহিংগীয়া যুৱতী

শিলচৰ, 31 আগষ্টঃ আজি প্ৰকাশ পাব NRC ৰ চূড়ান্ত তালিকা ৷ NRC ৰ চূড়ান্ত তালিকাৰ পূৰ্বে শুকুৰবাৰে নিশা 10 বজাত শিলচৰত আটক এগৰাকী ৰহিংগীয়া যুৱতী ৷ আটকাধীন যুৱতীগৰাকীৰ নাম হৈছে ৰোজি আখতাৰ ৷

শিলচৰৰ পৰা ত্ৰিপুৰা অভিমুখে যোৱাৰ সময়তে তাৰাপুৰ ৰে’ল ষ্টেচনৰ সন্মুখৰ পৰা আটক কৰে আৰক্ষীয়ে ৷ আৰক্ষীৰ জনোৱা মতে, TR 02K 0216 নম্বৰৰ এখন ৱাগনাৰ গাড়ীত যুৱক এজনে ত্ৰিপুৰালৈ লৈ যোৱাৰ সময়তে আটক কৰে ৷ যুৱতী আৰু গাড়ী চালকক আৰক্ষীয়ে আটক কৰে যদিও এজন পলাই যাবলৈ সক্ষম হয় ৷

যুৱতীগৰাকীৰ মতে, তেওঁ ম্যানমাৰৰ পৰা আহি বাংলাদেশৰ কক্স বজাৰৰ শিবিৰত আশ্ৰয় লৈ আছিল ৷ যি জন যুৱক লগত আহিছিল তেওঁ বাংলাদেশৰ আছিল বুলি জানিবলৈ দিয়ে যুৱতীগৰাকীয়ে ৷ অৱশ্যে যুৱতীগৰাকীয়ে যুৱকজনৰ পৰিচয় দিবলৈ সক্ষম হোৱা নাই ৷