শিলচৰ, 26 জুলাই :পুনৰ অশান্ত হৈ পৰিছে অসম-মিজোৰাম সীমান্ত ৷ মিজো দুৰ্বৃত্তই অসম আৰক্ষীক লক্ষ্য কৰি গুলীচালনা কৰাৰ ফলত 6 জনকৈ আৰক্ষীৰ জোৱান নিহত হৈছে ৷ ইতিমধ্যে টুইটাৰযোগে এই তথ্য প্ৰকাশ কৰিছে অসমৰ মুখ্যমন্ত্ৰী ড৹ হিমন্ত বিশ্ব শৰ্মাই ৷ এক সূত্ৰই সদৰী কৰা মতে, মিজো দুৰ্বৃত্তৰ গুলীত এগৰাকী স্থানীয় লোকো নিহত হৈছে ৷
এই সংঘৰ্ষত গুৰুতৰভাৱে আহত হৈছে কাছাৰ জিলাৰ আৰক্ষী অধীক্ষক বি চন্দ্ৰকান্ত নিম্বালকাৰ । ঢলাই থানাৰ ভাৰপ্ৰাপ্ত বিষয়া চাহাবুদ্দিন লস্কৰো আহত হৈছে মিজোৰ গুলীবৰ্ষণত । ৩০ জনতকৈ অধিক আৰক্ষী আৰু স্থানীয় লোক আহত হোৱা বুলি জানিব পৰা গৈছে । বৰ্তমানলৈকে নিয়ন্ত্ৰণলৈ অহা নাই লাইলাপুৰৰ পৰিস্থিতি ।
উল্লেখ্য যে, অসমৰ মুখ্যমন্ত্ৰী ড৹ হিমন্ত বিশ্ব শৰ্মাই মন্ত্ৰী পীযুষ হাজৰিকাক ঘটনাস্থলীত গৈ পৰিস্থিতিৰ বুজ ল'বলৈ বিশেষভাৱে নিৰ্দেশ দিছে ৷ দুয়োখন জিলাৰ সীমান্তৰ বিবদমান অঞ্চল লাইলাপুৰত সোমবাৰে পুৱাৰ ভাগতে সংঘটিত হোৱা গুলীয়াগুলিৰ ঘটনাৰ পাচতে অসমৰ মুখ্যমন্ত্ৰী ড৹ হিমন্ত বিশ্ব শৰ্মাক অধিক চিন্তাক্লিষ্ট হোৱা দেখা গৈছে ৷ ইতিমধ্যে দুয়োখন ৰাজ্যৰ সীমাত সৃষ্টি অশান্তময় পৰিস্থিতি শান্ত কৰাৰ স্বাৰ্থত টুইটযোগে মিজোৰামৰ মুখ্যমন্ত্ৰী জৰামথাংগাৰ হস্তক্ষেপ বিচাৰিছে মুখ্যমন্ত্ৰী ড৹ শৰ্মাই ৷
"Honble @ZoramthangaCMji , Kolasib ( Mizoram) SP is asking us to withdraw from our post until then their civilians won't listen nor stop violence. How can we run government in such circumstances? Hope you will intervene at earliest" মিজো চৰকাৰৰ হস্তক্ষেপ বিচাৰি টুইটাৰত এইদৰে লিখে মুখ্যমন্ত্ৰী ড৹ শৰ্মাই ৷
ইফালে আন এক টুইটত সীমান্তত শান্তি বজাই ৰখা আৰু সমস্যা সমাধানৰ ক্ষেত্ৰত আলোচনা কৰাৰ বাবে মিজোৰামৰ ৰাজধানী আইজল ভ্ৰমণ কৰাৰো ইচ্ছা প্ৰকাশ কৰে অসমৰ মুখ্যমন্ত্ৰীগৰাকীয়ে ৷ "I have just spoken to Hon’ble Chief Minister @ZoramthangaCM ji.I have reiterated that Assam will maintain status quo and peace between the borders of our state. I have expressed my willingness to visit Aizawl and disscuss these issues if need be ৷' মুখ্যমন্ত্ৰী ড৹ শৰ্মাই টুইটত এইদৰে মত প্ৰকাশ কৰে ৷