শিলচৰ, 26 চেপ্তেম্বৰঃ শিলচৰ মেডিকেল কলেজ হাস্পতালত ৰাজ্যৰ স্বাস্থ্য মন্ত্ৰী ড৹ হিমন্ত বিশ্ব শৰ্মাই মুকলি কৰিলে 40 খন বিছনাযুক্ত আই ছি ইউ কক্ষ ৷ উদ্ধোধনৰ পাছতেই আই ছি ইউ পৰিদৰ্শন কৰি অতি শীঘ্ৰে আৰু এটা 60 খন বিছনাযুক্ত আই ছি ইউ মুকলি কৰাৰ কথা সাংবাদিকৰ আগত প্ৰকাশ কৰিলে মন্ত্ৰীগৰাকীয়ে ৷ ইমানেই নহয়,অনাগত 15 দিনৰ ভিতৰত শিলচৰ মেডিকেল কলেজ হাস্পতাললৈ আৰু এটা প্লাজমা মেছিন আহিব বুলিও জানিবলৈ দিয়ে মন্ত্ৰী গৰাকীয়ে ৷
কৰ'ণা ভাইৰাছৰ সংক্ৰমণ সন্দৰ্ভত মন্তব্য কৰি মন্ত্ৰী গৰাকীয়ে কয় যে, কৰিমগঞ্জ আৰু হাইলাকান্দিৰ পৰিস্থিতি স্বাভাৱিক হৈ আছে যদিও কাছাৰৰ পৰিস্থিতি নিয়ন্ত্ৰণ হ'বলৈ কিছু সময়ৰ প্ৰয়োজন হ'ব ৷ উল্লেখ্য যে,অসম আৰক্ষীৰ উপ-পৰিদৰ্শকৰ লিখিত পৰীক্ষাৰ প্ৰশ্নকাকত ফাদিল আৰু পৰৱৰ্তী পৰ্যায়ৰ তদন্ত সন্দৰ্ভত সাংবাদিকে কৰা প্ৰশ্নৰ উত্তৰ দিয়াৰ পৰা বিৰত থাকে মন্ত্ৰী গৰাকী ৷
আই ছি ইউৰ উদ্ধোধনী অনুষ্ঠানত মন্ত্ৰী গৰাকীৰ লগত উপস্থিত থাকে শিলচৰ মেডিকেলৰ অধ্যক্ষ বাবুল বেজবৰুৱা, অধীক্ষক অভিজিৎ স্বামী, জিলা উপায়ুক্ত কীৰ্তি জল্লীৰ লগতে সকল সাংসদ বিধায়ক । সমান্তৰালকৈ একেটা দিনতে আন এখন ৫০০ বিচনাযুক্ত নতুন হাস্পতালৰ আধাৰশিলা স্থাপন কৰিলে মন্ত্ৰী গৰাকীয়ে ।