কাছাৰ, 12 জুলাই : কাছাৰ জিলাৰ উধাৰবন্দ আৰক্ষীয়ে (Udarband Police) দেওবাৰে নিচাযুক্ত সামগ্ৰীৰ বিৰুদ্ধে অভিযান চলাই বৃহৎ পৰিমাণৰ গাঞ্জা জব্দ কৰে ৷ উধাৰবন্দ আৰক্ষী থানাৰ অন্তৰ্গত টালিগ্ৰামৰ পৰা ৮০ কিলোগ্ৰাম গাঞ্জা জব্দ কৰে ৷ আৰক্ষীৰ দলটোৱে গাঞ্জা সৰবৰাহৰ লগত জড়িত থকাৰ অভিযোগত দুজন লোককো আটক কৰিবলৈ সক্ষম হয় । আৰক্ষীয়ে আটক কৰা সৰবৰাহকাৰী দুটা টালিগ্ৰামৰ বাসিন্দা বিমল পাচীৰ পুত্ৰ প্ৰদীপ পাশী (৪৫) আৰু মৃত সতু নুনিয়াৰ পুত্ৰ সুবাস নুনিয়া (৬৫) বুলি জানিব পৰা হৈছে ।
উধাৰবন্দ আৰক্ষী থানাৰ (Udarband Police Station) ভাৰপ্ৰাপ্ত আৰক্ষী বিষয়া প্ৰদীপ হালৈয়ে জানিবলৈ দিয়া অনুসৰি, উধাৰবন্দ আৰক্ষীয়ে এক গোপন সূত্ৰৰ ভিত্তিত লক্ষ্মীপুৰ এছ ডি পি অ' (SDPO) সৈতে যুটীয়াভাৱে অভিযান চলাই গাঞ্জাখিনি জব্দ কৰে ৷ আৰক্ষীয়ে আটক কৰা সৰবৰাহকাৰী দুটাক সম্প্ৰতি উধাৰবন্দ আৰক্ষীৰ জিম্মাত ৰখা হৈছে ৷ আৰক্ষীয়ে ঘটনাৰ সন্দৰ্ভত তদন্ত অব্যাহত ৰাখিছে ৷