বৰাকত অবৈধ কয়লা ট্ৰাক জব্দৰ আঁৰত আৰক্ষীৰ ভেকো-ভাওনা!
বৰাকত পুনৰ কয়লা ছিণ্ডিকেটে গা-কৰি উঠিছে । কৰিমগঞ্জ আৰক্ষীয়ে ছিণ্ডিকেটৰ লগত জড়িত তিনিখন ট্ৰাক জব্দ কৰি নাটক কৰাৰো গুৰুতৰ অভিযোগ উত্থাপিত হৈছে ।
কৰিমগঞ্জ, 15 ছেপ্তেম্বৰঃ বৰাকত বৃদ্ধি পাইছে কয়লা মাফিয়াৰ কাৰ্য-কলাপ ৷ অঞ্চলটোত নিতৌ বৃদ্ধি পাইছে অবৈধ কয়লাৰ সৰবৰাহ ৷ শনিবাৰে কৰিমগঞ্জৰ বদৰপুৰ থানাই তিনিখনকৈ কয়লা ভৰ্তি ট্ৰাক জব্দ কৰে ৷ ইফালে সমগ্ৰ ঘটনাৰ ওপৰত প্ৰতিক্ৰিয়া প্ৰকাশ কৰি এগৰাকী যুৱ কংগ্ৰেছী নেতাই এই ট্ৰাক জব্দ কাণ্ডক আৰক্ষীৰ পূৰ্বপৰিকল্পিত নাটক আখ্যা দিয়ে ৷ নেতাগৰাকীয়ে আৰক্ষীৰ অভিযানৰ ওপৰত প্ৰশ্ন উত্থাপন কৰি কয় যে প্ৰতিনিশাই এশ-দুশ ট্ৰাক অসম-মেঘালয় সীমান্তইদি কাছাৰ হৈ কৰিমগঞ্জত প্ৰৱেশ কৰে আৰু মাজে মাজে সময়ে আৰক্ষীয়ে কেৱল চৰকাৰী পক্ষৰ নেতা পালিনেতাৰ ওপৰত প্ৰশ্নৰ অৱতাৰণা ন'হবৰ বাবেই দুই তিনিখন কয়লা ভৰ্তি ট্ৰাক জব্দ কৰে ৷ আনহাতে নেতাগৰাকীয়ে এই সমগ্ৰ অবৈধ কয়লা সৰবৰাহত শাসকীয় দলৰ লোক জড়িত থকা বুলি অভিযোগ উত্থাপন কৰিছে৷ তেওঁ লগতে বৰ্তমানৰ চৰকাৰখনে দু্ৰ্নীতিমুক্ত স্বচ্ছ সমাজৰ কথা কৈ থাকে যদিও বাস্তৱত পূৰ্বতকৈ ৰাজ্যত অধিক দুৰ্নীতি বৃদ্ধি পোৱা বুলি ক্ষোভ ব্যক্ত কৰে ৷