কাছাৰ, 15 এপ্ৰিল :ক'লা সাম্ৰাজ্যলৈ পৰিণত হৈছে বৰাক উপত্যকা ৷ এই ক'লা সাম্ৰাজ্য চলাই নিছে একাংশ ৰাজনৈতি নেতা-পালিনেতা আৰু বিশেষ কেইজন মান উচ্চ পদস্থ লোকৰ পৃষ্ঠপোষকতাত একাংশ ক'লা বেপাৰীয়ে ৷ এই অভিযোগ ৰাইজৰ ৷ কিয়নো শেহতীয়াকৈ শিলচত একাংশ ক’লা বেপাৰী তথা ক’লা ব্যৱসায়ী চক্ৰই এক বৃহৎ বার্মিজ চুপাৰিৰ চিণ্ডিকেট গঢ়ি উঠাৰ অভিযোগ উত্থাপন হৈছে ৷ এই চিণ্ডিকেট গঢ়ি তোলা ক’লা ব্যৱসায়ী তথা চক্ৰটোৱে অকল যে বার্মিজ চুপাৰিৰ চিণ্ডিকেটেই চলাই নিছে সেয়া নহয়, সামান্তৰাল ভাৱে চলাই নিছে বাৰ্মিজ চিগাৰেটৰ লগতে কয়লা চিণ্ডিকেট ৷
এই বৃহৎ চক্ৰটোৱে চিণ্ডিকেটৰ জৰিয়তে বছৰে কোটি কোটি টকা ৰাজহ ফাকি দি অহাৰ লগতে বৰাকত সৃষ্টি কৰিছে অবৈধ বৃহৎ এখন বজাৰ ৷ মন কৰিবলগীয়া এই যে, এই ক’লা বেপাৰী চক্ৰটোৱে চিণ্ডিকেটৰ বাবে সহায় লৈছে ভাৰতীয় ৰেল সেৱা ৷ অৰ্থাৎ ৰেল সেৱাৰ জৰিয়তে চলাই নিছে বার্মিজ চুপাৰিৰ এই বৃহৎ চিণ্ডিকেট ৷ উল্লেখ্য যে, বৃহস্পতিবাৰে একাংশ সচেতন লোকে শিলচৰ ৰেল ষ্টেচনত প্ৰত্যক্ষ কৰে কেইবা বস্তা বাৰ্মিজ চুপাৰী ৷
বাৰ্মিজ চুপাৰী বস্তবোৰ প্ৰত্যক্ষ কৰাৰ পাচতে কেইবাটাও গুৰুত্বপূৰ্ণ মন্তব্য প্ৰকাশ কৰে স্থানীয় একাংশ লোকে ৷ তেওঁলোকৰ মতে ৰেল সেৱাৰ জৰিয়তেই বৰাক তথা অসমলৈ প্ৰত্যেক দিনে আমদানি হৈ আছে হাজাৰ হাজাৰ বস্তাৰ বাৰ্মিজ চুপাৰী ৷ এই চুপাৰী বজাৰখন সম্পূৰ্ণ ক’লা প্ৰক্ৰিয়া তথা অবৈধভাৱে চলি আহিছে বুলিও প্ৰতিক্ৰিয়া প্ৰকাশ কৰে স্থানীয় লোকে ৷