বন্যাৰ্তৰ ৰোষত উত্তৰ অভয়াপুৰী সমষ্টিৰ বিধায়ক

ৰাজ্য়ৰ অন্য প্ৰান্তৰ লগতে বঙাইগাঁও জিলাতো বানে তাণ্ডৱ চলাইছে ৷ সোমবাৰে বঙাইগাঁও জিলাৰ উত্তৰ অভয়াপুৰী সমষ্টিৰ বিভিন্ন বানপীড়িত অঞ্চল পৰিদৰ্শন কৰাৰ সময়ত বন্যাৰ্তৰ ৰোষত পৰিল বিধায়ক আব্দুল হাই নাগৰি ৷

উত্তৰ অভয়াপুৰী, 19 জুলাই : ৰাজ্যৰ বিভিন্ন প্ৰান্তত অব্য়াহত আছে বানৰ তাণ্ডৱ ৷ ক'ভিড-19 ৰ সমান্তৰালভাবে বানৰ বিভীষিকাময় পৰিস্থিতিয়ে জুৰুলা কৰিছে বানাক্ৰান্তক ৰাইজক ৷ ৰাজ্য়ৰ অন্য প্ৰান্তৰ লগতে বঙাইগাঁও জিলাতে বাৰিষাৰ বানে তাণ্ডৱ চলাইছে ৷ জিলাখনৰ বিভিন্ন অঞ্চল পানীৰ কৱলত পৰাৰ বাবে ৰাইজে ওখ ভেঁটি বা মাথাউৰিত আশ্ৰয় ল'ব লগা হৈছে ৷

সোমবাৰে বঙাইগাঁও জিলাৰ উত্তৰ অভয়াপুৰী সমষ্টিৰ বিভিন্ন বানপীড়িত অঞ্চল পৰিদৰ্শন কৰাৰ সময়ত বন্যাৰ্তৰ ৰোষত পৰিল বিধায়ক আব্দুল হাই নাগৰি ৷ বানাক্ৰান্ত ৰাইজৰ অভিযোগ অনুসৰি,বিগত এমাহ বানৰ কৱলত পৰা ৰাইজক বিধায়কগৰাকীয়ে কোনো ধৰণৰ খবৰ নকৰাৰ অভিযোগ ৷ কিন্তু সোমবাৰে সাংসদ আব্দুল খালেকে বানপীড়িত অঞ্চলসমূহ পৰিদৰ্শন কৰাৰ সময়ত বিধায়কগৰাকীয়ে সংগ দিয়াৰ সময়ত এই ঘটনা সংঘটিত হয় ৷ বিগত এমাহ ধৰি প্ৰলয়ংকাৰী বানত ককবকাই থকা নিজ সমষ্টিৰ লোকৰ খবৰ ল'বলৈ সময় নোপোৱা বিধায়কগৰাকীৰ ওপৰত অতিষ্ঠ হৈ পৰা বন্যাৰ্তই বিধায়কগৰাকীক সাংসদৰ লগত দেখা পাই ক্ষোভিত হৈ পৰে । আনকি,একাংশ বন্যাৰ্তই বিধায়ক গৰাকীক আগুৰি ধৰি প্ৰতিবাদ সাব্যস্ত কৰে ।

লগতে, বন্যাৰ্তৰ এনে কাৰ্য্যত বিধায়কৰ সমৰ্থকসকলে খৰ্গহস্ত হৈ বন্যাৰ্তক আক্ৰমণৰ লক্ষ্য কৰি লোৱাত দুয়ো পক্ষৰ মাজত হতাহতি হোৱা দেখা যায় । অৱশ্যে সাংসদগৰাকীৰ হস্তক্ষেপত পৰিস্থিতি নিয়ন্ত্ৰণত আহে বুলি জানিব পৰা গৈছে ।

উল্লেখযোগ্য যে, অসমত বৰ্তমান বানৰ কবলত 30 খন জিলাৰ প্ৰায় 50 লক্ষাধিক জনতা আক্ৰান্ত হোৱাৰ লগতে বানত 83 জনতকৈ অধিক লোকে মৃত্যু বৰণ কৰিব লগা হৈছে ৷

লগতে পঢ়ক :ৰাজ্যৰ বানত এইপৰ্যন্ত মৃত্যু 84 গৰাকীৰ