মাণিকপুৰ, 19 এপ্ৰিলঃ মাণিকপুৰৰ বেচিমাৰিত গৰুচোৰ বুলি অভিযোগ তুলি মাৰপিট গাড়ীৰ চালকক ৷ চালকজন কলগাছিয়াৰ দাবনদীয়া গাঁৱৰ মাইনউদ্দীন । একাংশ উদণ্ড যুৱকে নিশা দাবী কৰা ২০ হেজাৰ টকা নিদিয়াৰ বাবেই গৰু চোৰৰ অভিযোগ আনি মাৰপিট কৰে চালকজনক । লগতে উদণ্ড লোক কেইজনে জ্বলাই দিয়ে মাইনউদ্দীনৰ AS 15AC 1760 নম্বৰৰ বাহনখন ৷ পিচত মাণিকপুৰ আৰক্ষীৰ তৎপৰতাত উদ্ধাৰ কৰা হয় চালকজনক ।
বিশ্বনাথ চাৰিআলিৰ অমানৱীয় ঘটনাৰ পিচত এইবাৰ বঙাইগাঁও জিলাৰ মাণিকপুৰ আৰক্ষী থানাৰ অন্তৰ্গত বেচিমাৰী গাঁৱত সংঘটিত হৈছে আন এক সাম্প্ৰদায়িক ঘটনা । এইবাৰ মাংস বিক্ৰীৰ বাবে নহয় । এইবাৰ মুছলিম সম্প্ৰদায়ৰ লোক হোৱাৰ বাবে চান্দাৰ নামত দাবী কৰা ২০ হেজাৰ টকা নিদিয়াৰ বাবেই গৰু চোৰৰ অভিযোগ আনি মাৰধৰ মাইনউদ্দীন নামৰ চালকজনক ৷
উল্লেখ্য যে, বঙাইগাঁও জিলাৰ বাংলাপাৰাত চিমেণ্ট নমাই ঘৰলৈ আহি থকা অৱস্থাত বেচিমাৰী চকত নিশা ৮:৩০ মান বজাত কেইজনমান উদণ্ড যুৱকে গাড়ীখন ৰখাই মাইনউদ্দীনক নাম সোধাৰ পাচতেই বিভিন্ন গালি-গালাছ পাৰি ২০ হেজাৰ টকা চান্দা দাবী কৰে । চান্দা দিব নোৱাৰাত গৰু চোৰ বুলি মাৰপিট কৰি ভুক্তভোগী চালক জনৰ বাহনখন জ্বলাই দিয়ে । পিচত মাণিকপুৰ আৰক্ষীৰ উদ্যোগত মাইনউদ্দীনক উদ্ধাৰ কৰি চিকিৎসালয়ত ভৰ্তি কৰোৱা হয় ৷