বঙাইগাঁও/গুৱাহাটী, ২৩ ডিচেম্বৰ:বছৰটো শেষৰ দিনকেইটাত ৰাজ্যত বৃদ্ধি পাইছে অপৰাধজনিত ঘটনা । প্ৰান্তে প্ৰান্তে জব্দ কৰা হৈছে বিভিন্ন অবৈধ সামগ্ৰী । সমানে সক্ৰিয় হৈ উঠিছে অবৈধভাৱে সোণ সৰবৰাহকাৰী এটা চক্ৰ । শনিবাৰৰ দিনটোত গুৱাহাটী মহানগৰী আৰু বঙাইগাঁৱত জব্দ কৰা হয় বুজন পৰিমাণৰ অবৈধ সোণ ।
নিউ বঙাইগাঁও ৰে'লৱে ষ্টেচনত ৰে'ল আৰক্ষীয়ে অভিযান অভিযান চলাই অবৈধভাবে সৰবৰাহ কৰা ৪০০.৫৯ গ্ৰাম সোণসহ এটা সৰবৰাহকাৰীক আটক কৰিবলৈ সক্ষম হয় । ৰে'ল আৰক্ষীয়ে গোপন সূত্ৰৰ পম খেদি নামনিমুৱা গুৱাহাটী-হাওৰা শৰাইঘাট এক্সপ্ৰেছত চলাইছিল এই অভিযান । সোণখিনি গুৱাহাটীৰ পৰা কলকাতালৈ সৰবৰাহ কৰাৰ চেষ্টা চলাইছিল বুলি জানিবপৰা গৈছে । নিউ বঙাইগাঁও জি আৰ পিৰ ভাৰপ্ৰাপ্ত আৰক্ষী বিষয়া সঞ্জীৱ চৌধুৰীৰ নেতৃত্বত চলোৱা হয় এই অভিযান । জব্দকৃত সোণ খিনিৰ বজাৰ মূল্য প্ৰায় ২৪ লক্ষাধিক টকা বুলি জানিব পৰা গৈছে । ইতিমধ্যে সমগ্ৰ ঘটনাক লৈ আৰক্ষীয়ে আৰম্ভ কৰিছে তদন্ত ।
ইফালে একেদিনাই গুৱাহাটী ৰে'লেৱে ষ্টেচনত বৃহৎ পৰিমাণৰ সোণৰ বিস্কুটসহ বিদেশী নোট জব্দ কৰা হয় । পূৰ্বত্তোৰ চম্পকক্ৰান্তি এক্সপ্ৰেছৰ পৰা জব্দ কৰা হয় সোণৰ বিস্কুটসহ বিদেশী নোটখিনি । সোণৰ বিস্কুটসহ গ্ৰেপ্তাৰ কৰে দুই সৰবৰাহকাৰীক । ধৃত সৰবৰাহকাৰী কেইটা ক্ৰমে ৰাজস্থানৰ শ্ৰৱন সিং ৰাথোৰ, দিলীপ কুমাৰ বুলি জানিবপৰা গৈছে । শনিবাৰে পুৱা ৰে'ল আৰক্ষীয়ে পূৰ্বত্তোৰ চম্পকক্ৰান্তি এক্সপ্ৰেছত নিয়মীয়া তালাচী চলায় দুই সৰবৰাহকাৰীৰ পৰা ৬৫ খন সোণৰ বিস্কুট জব্দ কৰে, যাৰ ওজন ১.৩ কিলোগ্ৰাম ।