বঙাইগাঁও, 15 জুন : কিছু দিন ধৰি হৈ থকা নেৰানেপেৰা বৰষুণৰ ফলত পুনৰ জলমগ্ন হৈ পৰিছে ৰাজ্যৰ ভিন্ন অঞ্চল(Flood in Assam)। বঙাইগাঁও জিলাৰ আই নৈৰ বুকুত ঘৰ-বাৰী হেৰুৱাই এতিয়া অঘৰীৰ দৰেই বসবাস কৰিছে এখন গাঁৱৰ ৰাইজে(Flood in Bongaigaon due to heavy rainfall) । উত্তৰ অভয়াপুৰী বিধানসভা সমষ্টিৰ অন্তৰ্গত ২ নং বাশবাৰী আৰু টেণ্ডনপুৰ গাঁও দুখন বিগত এবছৰ ধৰি আই নৈৰ গৰাখহনীয়াই উটুৱাই নিয়ে । ঘৰ-বাৰী হেৰুৱাই বাশবাৰী কালি মন্দিৰৰ সন্মুখত শিবিৰ পাতি বসবাস কৰি আছে ২০ টাতকৈও অধিক পৰিয়াল(Flood in Bongaigaon) ।
বিগত কেইবাদিন ধৰি হোৱা নেৰা-নেপেৰা বৰষুণৰ এতিয়া যমৰ যাতনা ভুগিবলগীয়া হৈছে ৰাইজে । ঘৰৰ ভিতৰত সোমাইছে একঁকাল পৰ্যন্ত পানী । কোনোবাই যদি এসাঁজ খাইছে তেনেহ'লে আন কোনোবাই আকৌ অনাহাৰে থাকিব দিন কটাবলগীয়া হৈছে । বিদ্যুৎ নথকাৰ বাবেই কেৰাচিনৰ চাকিটোৱেই এই লোকসকলৰ একমাত্ৰ ভৰসা হৈ পৰিছে । ইমানৰ পিচতো এই ক্ষেত্ৰত স্থানীয় বিধায়ক তথা জিলা প্ৰশাসনে কোনো গুৰুত্ব প্ৰদান নকৰাৰ অভিযোগ ৰাইজৰ ৷ শীঘ্ৰেই এই পৰিস্থিতি সমাধান নকৰিলে এই লোকসকলৰ জীৱনলৈ নামি আহিব পাৰে চৰম ভাবুকি ৷