ইটিভি ভাৰতৰ বাতৰিৰ প্ৰভাৱ : পচকীবালা ৰায়ৰ ঘৰলৈ সাহায্য

বঙাইগাঁৱত ইটিভি ভাৰতৰ বাতৰিৰ প্ৰভাৱ ৷ বাতৰি প্ৰকাশৰ পিছতে চকু মেল খালে চৰকাৰ তথা জিলা প্ৰশাসনৰ ৷ অসহায় বৃদ্ধাৰ বাসগৃহৰ মেৰামতি আৰু খোৱাপানীৰ বাবদ দমকল যোগান দিলে প্ৰশাসনে ৷

বঙাইগাঁও,26 ডিচেম্বৰ : কিছুদিন পূৰ্বে ইটিভি ভাৰতত প্ৰকাশিত হৈছিল এগৰাকী অকলশৰীয়া বৃদ্ধাৰ জীৱন সংগ্ৰামৰ কাহিনী ৷ অকলশৰে জীৱনৰ দিন পাৰ কৰা বৃদ্ধাগৰাকীৰ উপযুক্ত এটা বাসগৃহ নথকাৰ লগতে অভাৱ আছিল খাদ্যৰ ৷ কিন্তু বাতৰি প্ৰকাশৰ পিছতে তৎপৰ হৈ পৰে জিলা প্ৰশাসন ৷

বিশেষভাৱে সক্ষম বৃদ্ধা পচকীবালা ৰায়ৰ ঘৰলৈ জিলা প্ৰশাসনে আগবঢ়াই এটি দমকল ৷ লগতে দীৰ্ঘদিনে আধৰুৱা হৈ থকা চৰকাৰী গৃহৰ নিৰ্মাণকাৰ্য আৰম্ভ কৰাৰ বাবে নিৰ্দেশ প্ৰদান কৰে ৷

সাহায্য লাভ কৰি স্বাভাৱিকতে হাঁহি বিৰিঙিছে পচকীবালা ৰায়ৰ ওঁঠত ৷ জানিব পৰা মতে, বৃদ্ধাগৰাকীলৈ শীঘ্ৰে চৰকাৰে আগবঢ়াব এটি অনাময় শৌচালয়, বিপিএল আঁচনিৰ অধীনৰ বিদ্যুত সংযোগ ৷ অঞ্চলটোৰ স্থানীয় ৰাইজে সংবাদ মাধ্যমৰ এই পদক্ষেপৰ বাবে কৃতজ্ঞতা প্ৰকাশ কৰে ৷

লগতে চাওকঃহোজাইত পিষ্টল সহ আটক দুই কুখ্যাত অপৰাধী