দক্ষিণ শালমাৰাত উদ্ধাৰ বৃহৎ পৰিমাণৰ পশুখাদ্য

দক্ষিণ শালমাৰাৰ ৰাইজৰ অভিযোগৰ ভিত্তিত আৰক্ষীয়ে জব্ধ কৰে বৃহৎ পৰিমাণৰ পশুখাদ্য ৷

ধুবুৰী, 26 জুলাই: বান সাহাৰ্যৰ নামত চোৰাং কাৰবাৰ দক্ষিণ শালমাৰাত৷ ৰাইজে উদ্ধাৰ কৰিলে বৃহৎ পৰিমাণৰ পশুখাদ্য৷ ৰাজ্যত বিধ্বংসী বানত সৰ্বস্বান্ত হ'ল হাজাৰ হাজাৰ লোক৷ ঘৰ-বাৰী হোৰুওৱাই বিভিন্ন আশ্ৰয় শিবিৰত পশুধনৰ লগত একেলগে দিন কটাবলগীয়া হৈছে দুৰ্ভগীয়া লোকসকলে৷

বানে জুৰুলা কৰা ৰাইজক এতিয়া চৰকাৰৰ ফালৰ পৰা যোগান ধৰা হৈছে খাদ্য সামগ্ৰী, ঔষধৰ লগতে পশু খাদ্য৷ কিন্তু দুখৰ বিষয় যে এই দুৰ্যোগৰ সময়খিনিতো পশু খাদ্য যোগানৰ নামত একাংশ লোকে আৰম্ভ কৰিছে এক লাভজনক ব্যৱসায়৷ পশুখাদ্যৰ নামত চোৰাং বেহা কৰা পৰিলক্ষিত হৈছে দক্ষিণ শালমৰাত৷ দক্ষিণ শালমাৰাৰ ৰাইজৰ অভিযোগ অনুসৰি এক বৃহৎ পৰিমাণৰ পশুখাদ্য জব্দ হয় অসম মেঘালয় সীমান্তৱৰ্তী পানকাটা গাঁও পঞ্চায়তৰ টেপৰ পাৰাৰ আব্দুল হক নামৰ এজন লোকৰ ঘৰত৷ কোনে, কেতিয়া, ক'ত, কেনেকৈ সেই পশুখাদ্য আব্দুলৰ ঘৰত ৰাখিলে সেই বিষয়ে জ্ঞাত নহয় কোনো লোক৷ স্থানীয় ৰাইজৰ লগতে আমছু কৰ্মীসকলে আব্দুলৰ ঘৰত প্ৰত্যক্ষ কৰে এই পশুখাদ্য সমূহ৷

আনহাতে এই পশুখাদ্যসমূহৰ বিষয়ে জ্ঞাত নহৈ ঘৰৰ মালিকেও কালাপানী আৰক্ষী চকীত এখন এজাহাৰ দাখিল কৰিছে৷ এই এজাহাৰৰ ভিত্তিতেই ঘটনাস্থলীত কালাপানী আৰক্ষী চকীৰ ভাৰপ্ৰাপ্ত বিষয়া উপস্থিত হৈ এই 25 বস্তা পশুখাদ্য জব্দ কৰে৷

উল্লেখযোগ্য যে দুদিন পূৰ্বে জিলাখনত মুখ্যমন্ত্ৰী উপস্থিত হৈ সকলো বানাক্ৰান্ত ৰাইজক বান সাহায্য আৰু পশু খাদ্য প্ৰদানৰ বাবে কঠোৰ নিৰ্দেশ জাৰি কৰাৰ পিছতো গুৰুত্ব প্ৰদান কৰা নাই জিলা জিলাপ্ৰসনে৷ যাৰ ফলত একাংশ লোকৰ তত্বাৱধানত এতিয়াও অবাধে চলি আছে পশু খাদ্য বিতৰণৰ নামত চোৰাং কাৰবাৰ৷