বঙাইগাঁৱত মৰেল পুলিচগিৰি: আটক তিনিজন

বঙাইগাঁৱৰ গৰাইমাৰীত সংঘটিত হৈছে অমানৱীয় ঘটনা । মৰেল পুলিচ ৰূপী শিক্ষকৰ নেতৃত্বত একাংশ লোকে হাত ভৰি বান্ধি, নগ্ন কৰি চোৰৰ সন্দেহত প্ৰহাৰ কৰা হয় এজন যুৱকক ৷ ঘটনাৰ অভিযোগত তিনিজনক আটক ৷

বঙাইগাঁও, 24মে': বঙাইগাঁও জিলাৰ সদৰ থানাৰ অন্তৰ্গত গৰাইমাৰীত সংঘটিত হোৱা মৰেল পুলিচগিৰীৰ ঘটনাৰ অভিযোগত অভিযুক্ত হোৱা তিনিজনত মঙলবাৰে আটক কৰে আৰক্ষীয়ে ৷ ঘটনাৰ সৈতে জড়িত আন বহু কেইজন বৰ্তমানেও পলাতক ৷

উল্লেখ্য যে, বিগত 21মে'ত বঙাইগাঁও জিলাৰ সদৰ থানাৰ অন্তৰ্গত গৰাইমাৰীত সংঘটিত হৈছিল মৰেল পুলিচগিৰীৰ এক ঘটনা। দিন দুপৰতে চোৰৰ সন্দেহত হাত ভৰি বান্ধি, অৰ্ধ নগ্ন কৰি প্ৰায় ১০ জন লোক জপিয়াই পৰিছিল আবেদ আলী নামৰ এজন যুৱক জনৰ ওপৰত। ভানু দাস নামৰ শিক্ষকজনৰ নেতৃত্বত এই ঘটনা সংঘটিত হোৱা বুলি অভিযোগ উত্থাপন হৈছিল ৷

ইপিনে, মুমূৰ্ষু অৱস্থাত যুৱকজনক আৰক্ষীয়ে উদ্ধাৰ কৰে যদিও যুৱকজনৰ অৱস্থা বৰ্তমানেও সংকটজনক বুলি জানিব পৰা গৈছে। ইতিমধ্যে যুৱকজনৰ পৰিয়ালৰ লোকে মৰেল পুলিচ ৰূপী ভানু দাস, বিজয়, বিপ্লৱ শৰ্মা, ৰূপম দাস, সুব্ৰত দাসৰ বিৰুদ্ধে এজাহাৰ দাখিল কৰিছে ৷

আৰক্ষীয়ে এই পৰ্যন্ত তিনিজন লোককহে কৰায়ত্ব কৰিবলৈ সক্ষম হয়। পলায়ন হৈ থকা আন অভিযুক্ত সকলক অতি শীঘ্ৰে কৰায়ত্ব কৰি দৃষ্টান্তমূলক শাস্তি প্ৰদানৰ বাবে দাবী জনাইছে যুৱকজনৰ পৰিয়ালৰ লোকে।

আনহাতে, চোৰৰ সন্দেহত সংকটজনক অৱস্থাত উদ্ধাৰ কৰা যুৱক জনক প্ৰেৰণ কৰা হয় জেললৈ ৷ যাৰ বাবে ক্ষোভ প্ৰকাশ কৰে যুৱকজনৰ পৰিয়ালে ৷ যুৱকজনৰ উন্নত চিকিৎসাৰ দাবী জনাইছে এতিয়া পৰিয়ালৰ লোকে।

অন্য এক খবৰৰ বাবে: কেৰালাৰ পৰা অহা 9 জনকৈ লোকৰ দেহত কৰ'ণাৰ উপস্থিতি