বঙাইগাঁও, ২৯ জুলাই: অসম আৰক্ষী অধীক্ষকসকলৰ সন্মিলৰ আজি দ্বিতীয় দিন ৷ আজি সন্মিলন আৰম্ভ হোৱাৰ পূৰ্বে চহৰখনৰ কেইবাটিও নতুন প্ৰকল্প আৰু নিৰ্মিয়মান প্ৰকল্পত মুখ্যমন্ত্ৰীগৰাকী উপস্থিত হৈ পৰিদৰ্শন কৰাৰ লগতে কামৰ খতিয়ান লয় ৷ পুৱাই আঠ বজাত মুখ্যমন্ত্ৰীয়ে বঙাইগাঁৱৰ জেল্কাঝাৰত নিৰ্মীয়মাণ ইনটিগ্ৰেটেড জিলা আয়ুক্তৰ কাৰ্যালয় পৰিদৰ্শন কৰে আৰু ইয়াৰ অগ্ৰগতিৰ বুজ লয় ৷
পৰিদৰ্শন কালত মুখ্যমন্ত্ৰীক সংগ দিয়ে বিধায়ক ফণীভূষণ চৌধুৰী আৰু প্ৰাক্তন বিধায়ক অশোক সিংহীয়ে ৷ ইনটিগ্ৰেটেড আয়ুক্ত কাৰ্যালয়টোৰ নিৰ্মাণকাৰ্য ক্ষীপ্ৰ গতিত চলি থকা বুলি মুখ্যমন্ত্ৰীগৰাকীয়ে কয় । সঠিকভাৱে নিৰ্মাণ কাৰ্য চলি আছে যদিও কামৰ ক্ষেত্ৰত কিছু খৰতকীয়া কৰিব লাগিব বুলি কয় তেওঁ ।
২০২৬ চনৰ ভিতৰত এই কাৰ্যালয়টো মুকলি কৰাৰ পৰিকল্পনা কৰিছে বুলি মন্তব্য কৰে মুখ্যমন্ত্ৰীগৰাকীয়ে ৷ ইয়াৰ পিচতে চহৰৰ মাজমজিয়াত নিৰ্মাণ কৰা থীম পাৰ্কখনত উপস্থিত হৈ পৰ্যবেক্ষণ কৰে ৷ তাৰ পিচতে বঙাইগাঁও চহৰৰ উত্তৰ বঙাইগাঁৱত থকা পৰিৱেশ উদ্যানত চি আই ডি এফ আঁচনিৰে প্ৰায় ১৬ কোটি টকাৰে নিৰ্মাণ কৰি উলিওৱা ৱাৰ্টাৰ পাৰ্কখন পৰিদৰ্শন কৰি ইয়াৰ বুজ লয় মুখ্যমন্ত্ৰীগৰাকীয়ে ৷
একেদৰে মুখ্যমন্ত্ৰীগৰাকীয়ে বঙাইগাঁও ৱাকিং জ’নত 25 লাখ টকা ব্যয় সাপেক্ষে নতুন কৈ নিৰ্মাণ ৰাষ্ট্ৰীয় পতাকা উত্তোলনৰ স্থায়ী ভেটি আৰু স্তম্ভ মুকলি কৰি পতাকা উত্তোলন কৰে হিমন্ত বিশ্ব শৰ্মাই ৷ ইয়াৰ পিচতে বঙাইগাঁও আই টি আই খেল পথাৰত নৱ নিৰ্মিত পুলিচ কনভেনশ্যন চেন্টাৰৰ চৌহদত এডাল গছ পুলি ৰোপন কৰে আৰু ইয়াৰ পিচতে আজিৰ আৰক্ষী অধীক্ষক সন্মিলনত অংশ গ্ৰহণ কৰে মুখ্যমন্ত্ৰীগৰাকীয়ে ৷
লগতে পঢ়ক:Rohingya infiltration: ৰহিংগীয়া অনুপ্ৰৱেশৰ কৰিডৰ অসম; হিমন্ত বিশ্ব শৰ্মা
