বঙাইগাঁও, ২০ মাৰ্চঃ বিভিন্ন দাবীৰে বুধবাৰে বঙাইগাঁও জিলাত প্ৰতিবাদী সমদল বাহিৰ কৰে চেন্ট্ৰেল ৰিপ্ৰেজেন্টিটিভ ইউনিয়ন নামৰ সংগঠনটোৱে । স্বাস্থ্য সেৱাৰ সৈতে জড়িত ব্যক্তিগত খণ্ডৰ শ্ৰমিকৰ উমৈহতীয়া সংগঠনটোৱে সেৱাখণ্ডটোৰ লগত জড়িত থকা সকলো কৰ্মচাৰীয়ে দীৰ্ঘদিনীয়া দাবী পুৰণ কৰিবলৈ সমদল উলিয়াই প্ৰতিবাদ সাব্যস্ত কৰে ।
জিলাখনৰ মুল চহৰৰ গান্ধী ময়দানৰ পৰা ওলোৱা এই সমদলটো বঙাইগাঁও চহৰৰ মাজেৰে গৈ পুনৰাই গান্ধী ময়দানত সমাপ্ত হয় । স্বাস্থ্য সেৱাৰ লগত জড়িত থকা মেডিকেল ৰিপ্ৰেজেন্টিটিভসকলৰ নূন্যতম সা-সুবিধা প্ৰদানৰ দাবীৰে এই সমদল বাহিৰ কৰে সংস্থাটোৱে । মেডিকেল ৰিপ্ৰেজেন্টিটিভসকলৰ নূন্যতম দৰমহা ১৮০০০ কৰা, ৮ ঘন্টাকৈ কাম কৰাৰ স্বীকৃতি প্ৰদান কৰা, আইন ভংগকাৰী কোম্পানীসকলৰ বিৰুদ্ধে বিহীত ব্যৱস্থা গ্ৰহণ কৰা আদি বিভিন্ন দাবী উত্থাপন কৰে ৷ সংস্থাৰ প্ৰতিনিধিসকলে তেঁওলোকৰ দাবী মানি নল'লে অনাগত দিনত আৰু অধিক তীব্ৰতৰ আন্দোলন কৰাৰ হুংকাৰ দিয়ে ৷