বঙাইগাঁও,১৯জুলাই: শনিবাৰে নিশাৰে পৰা হৈ থকা নেৰানেপেৰা বৰষুণৰ ফলত বঙাইগাঁও সদৰ চহৰখনত সৃষ্টি হৈছে কৃত্ৰিম বান । চহৰখনত উদ্ধাৰ অভিযানৰ বাবে নিযোজিত কৰিব লগা হৈছে এচডিআৰএফৰ দল । বানৰ কৱলত পৰা চহৰবাসীৰ অসুবিধাৰ বুজ ল'বলৈ উপস্থিত হৈছেগৈ ৰাজ্যখনৰ যোগান মন্ত্ৰী তথা স্থানীয় বিধায়ক ফণীভূষন চৌধুৰী ।
নেৰানেপেৰা বৰষুণৰ ফলত সৃষ্ট এই কৃত্ৰিম বানত বুৰিল বঙাইগাঁও সদৰ চহৰৰ পালপাৰা,কদমতলি,মায়াপুৰি,বঙাইগাঁও কলেজ ৰোড,পাৰ্ক আদি । এবুকুলৈ পানী জমা হোৱা পালপাৰাত ইতিমধ্যে এচডিআৰএফৰ জোৱানে চলাইছে উদ্ধাৰ অভিযান ।
ৰাজ্যৰ যোগান মন্ত্ৰী তথা স্থানীয় বিধায়ক গৰাকীয়ে দেওবাৰে বঙাইগাঁও চহৰৰ পালপাৰাকে আদি কৰি চহৰখনৰ বিভিন্ন ঠাইত উপস্থিত গৈ কৃত্ৰিম বানত আৱদ্ধ হোৱা লোকসকলৰ খবৰ লোৱাৰ লগতে বুজ লৈছে ক্ষয় ক্ষতিৰো ।
উল্লেখ্য যে, এজাক নেৰানেপেৰা বৰষুণ আহিলেই কৃত্ৰিম বানত ডুব যায় চহৰখনৰ বিভিন্ন অঞ্চল । বঙাইগাঁও পৌৰসভাই এই ক্ষেত্ৰত কোনো গুৰুত্বপূৰ্ণ পদক্ষেপ গ্ৰহণ কৰি বৰষুণৰ ফলত আৱদ্ধ পানী নিষ্কাষণৰ কোনো ব্যৱস্থা গ্ৰহণ কৰা দেখিবলৈ পোৱা নায় । স্থানীয় বিধায়ক আৰু পৌৰসভাৰ গুৰুত্বহীনতাৰ বাবেই প্ৰতিবছৰে এই দৰে চহৰখনৰ পালপাৰা,কদমতলি আদি ঠাই কৃত্ৰিম বানত বুৰ যাবলগা হৈ আহিছে বুলি অভিযোগ তুলিছে চহৰবাসীয়ে ।
উল্লেখ্য যে, দেওবাৰৰ পৰা দুদিন ধৰি ৰাজ্যত ধাৰাষাৰ বৰষুণৰ সম্ভাৱনাৰে আঞ্চলিক বতৰ বিজ্ঞান কেন্দ্ৰই সতৰ্ক কৰি দিছিল সমগ্ৰ ৰাজ্যক ।