বঙাইগাওঁ, 25 আগষ্টঃ বহুচৰ্চিত অসমৰ খিলঞ্জীয়া নিৰূপণ প্ৰক্ৰিয়াত ভূমিপুত্ৰ সূত্ৰধৰসকলক প্ৰায় একাষৰীয়া কৰাত সদৌ অসম সূত্ৰধৰ সন্মিলনী আৰু সূত্ৰধৰ ছাত্ৰ সন্থাই ক্ষোভ প্ৰকাশ কৰিছে ৷ সংগঠন দুটাৰ স্পষ্ট দাবী- অসমীয়া খিলঞ্জীয়া ভুমিপুত্ৰ সূত্ৰধৰসকলক বাদ দি অসমীয়াৰ সংজ্ঞা কেতিয়াও মানি লোৱা নহ'ব । সূত্ৰধৰসকলক বাদ দি অসম চুক্তিৰ 6নং দফাৰ ৰূপায়ণ কৰিবলৈ লোৱা কাৰ্য নিন্দনীয় বুলি অভিহিত কৰে সংগঠনদ্বয়ৰ বিষয়ববীয়াই ৷
আনহাতে অসমত সূত্ৰধৰসকল নিজৰ অস্তিত্বৰ সংকটত পৰি অইন জনগোষ্ঠীৰ সৈতে চামিল হোৱাৰ কথাটোতো নিজৰ উদ্বিগ্নতা ব্যক্ত কৰে সন্মিলনীৰ সভাপতি পৰমেশ্বৰ সূত্ৰধৰে ৷ খিলঞ্জীয়া ভূমিপুত্ৰ সূত্ৰধৰসকলক ইতিহাসৰ বিভিন্ন সময়ত বিশেষকৈ অসম আন্দোলনৰ সময়ত বহিৰাগত বুলি প্ৰতিপন্ন কৰাৰ চেষ্টা চলাই যথেষ্ট হাৰাশাস্তি কৰাৰ অভিযোগও উত্থাপন কৰে ৷ সংবাদমেলত সদৌ অসম সূত্ৰধৰ সন্মিলনীৰ সভাপতি পৰমেশ্বৰ সূত্ৰধৰ,সাধাৰণ সম্পাদক বিৰাজ মোহন সূত্ৰধৰ, সদৌ অসম সুত্ৰধৰ ছাত্ৰ সন্থাৰ সাধাৰণ সম্পাদক সুখধৰ সূত্ৰধৰ,সদৌ বিটিচি সূত্ৰধৰ সন্মীলনীৰ সভাপতি অমুল্য সূত্ৰধৰ আৰু সম্পাদক মাধৱ সুত্ৰধৰসহ ভালে সংখ্যক লোক উপস্থিত থাকে ।