বঙাইগাঁও,16অক্টোবৰ : বঙাইগাওঁ জিলাৰ সৃজনগ্রাম শিক্ষাখণ্ডৰ অন্তৰ্গত ২ নং বালাৰচৰ প্রাথমিক বিদ্যালয়ত চলিছে অনিয়ম ৷ বিদ্যালয়খনৰ প্ৰধান শিক্ষয়িত্ৰী ৰীণা বৰ্মনে মধ্যাহ্ন ভোজনৰ নামত ধন আত্মসাৎ কৰাৰ লগতে বিদ্যালয়খনত থকা 6জন শিক্ষকে পাঠদানৰ নিয়ম নমনাৰ অভিযোগ একাংশ অভিভাৱকৰ ৷ ইফালে, বিদ্যালয়খনৰ প্ৰধান শিক্ষয়িত্ৰী ৰীণা বৰ্মণে অভিভাৱকসকলৰ এই অভিযোগ নস্যাৎ কৰি কয়, ''মই গেলি পচি যোৱা চাউল নাই অনা, এন্দুৰে খাইছে চাউলখিনি '' ৷
অভিযোগ অনুসৰি, বিদ্যালয়খনৰ প্ৰধান শিক্ষয়িত্ৰী ৰীণা বৰ্মনে বিদ্যালয়খনৰ ছাত্ৰ-ছাত্ৰীৰ বাবে অহা মধ্যাহ্ন ভোজনৰ ধন হৰলুকী কৰি ছাত্ৰ-ছাত্ৰীসকলক গেলি-পচি যোৱা চাউলৰ খিচিৰি খোৱাই আহিছে ৷
অভিভাৱকসকলৰ মত অনুসৰি, প্ৰধান শিক্ষয়িত্ৰীগৰাকীয়ে দীৰ্ঘদিনৰ পৰাই এই কাৰ্য সংঘটিত কৰি আহিছে ৷ ইফালে,শিক্ষা বিভাগে প্রস্তুত কৰা খাদ্য তালিকাক অমান্য কৰি নিম্নমানৰ সামগ্ৰী ছাত্ৰ-ছাত্ৰীসকলক দিয়ে বুলি একাংশ লোকে অভিযোগ উত্থাপন কৰে ৷ এতিয়া অভিভাৱকসকলৰ বিভাগীয় কৰ্তৃপক্ষলৈ অনুৰোধ অতি শীঘ্ৰে এই ঘটনাৰ বিহীত ব্যৱস্থা গ্ৰহণ কৰক ৷ অন্যথা বিদ্যালয়খনৰ ছাত্ৰ-ছাত্ৰীসকলক অসুস্থ হোৱাটো নিশ্চিত বুলিও সাংবাদিকৰ আগত মন্তব্য কৰে ৷