বঙাইগাঁও,22 ছেপ্তেম্বৰঃ বঙাইগাঁও জিলাৰ বইটামাৰীত আৰক্ষীৰ অভিযানত বৃহৎ পৰিমানৰ নিচাযুক্ত ঔষধ জব্দ । মঙলবাৰে দুপৰীয়া ঔম লজিষ্টিক নামৰ ট্ৰেনছপৰ্টৰ বাহনৰ পৰা জব্দ কৰে নিচাযুক্ত ঔষধখিনি । গুৱাহাটীৰ পৰা এ-এচ-২৫-এচি-১০১৩ নম্বৰ গাড়ীৰে আনি আছিল বঙাইগাঁও অভিমুখে ।
উল্লেখযোগ্য যে, ঔষধখিনিৰ ভিতৰত OWNREX নামৰ 3900 নিষিদ্ধ ক’ফ চিৰাপ বটল জব্দ কৰে আৰক্ষীয়ে। জানিব পৰা মতে, গুৱাহাটীৰ পৰা ধুবুৰী জিলাৰ চাপৰলৈ সৰবৰাহ কৰা হৈছিল উক্ত নিচাজাতীয় দ্ৰব্যখিনি । ইপিনে অভিযানৰ সময়ত ঔষধ সৰবৰাহৰ সৈতে জড়িত দুজনক আটক কৰিছে বইটামাৰী আৰক্ষীয়ে । আটকাধীন ঔষধসৰবৰাহী কেইজন হৈছে পানেশ্বৰ নাৰ্জাৰী আৰু ৰূপম দাস ৷ আনহাতে প্ৰায়েই ৰাষ্ট্ৰীয় ঘাই পথেৰে নিচাজাতীয় নিষিদ্ধ ঔষধ সৰবৰাহৰ অভিযোগ উত্থাপন কৰিছে স্থানীয় লোকে । অন্যান্য অত্যাৱশ্যকীয় ঔষধৰ লগতে নিষিদ্ধ ঔষধ সৰবৰাহ কৰে দুষ্টচক্ৰই। সম্প্ৰতি যুৱ প্ৰজন্মক নিচাজাতীয় ঔষধ খুৱাই ধ্বংসৰ মুখলৈ ঠেলি দিয়াৰ চেষ্টা কৰিছে ড্ৰাগচ মাফীয়াই।
