NRC ৰ পৰা বাদ পৰা বৈধ ভাৰতীয়ক সহায় কৰিব প্ৰদেশ কংগ্ৰেছে

বঙাইগাঁওত প্ৰদেশ কংগ্ৰেছ নেতৃত্বৰ মতবিনিময় অনুষ্ঠান । সদ্য প্ৰকাশিত এন আৰচিৰ চূড়ান্ত তালিকাৰ পৰা বাদ পৰা ভাৰতীয় লোক সকলৰ সৈতে এই মত বিনিময় অনুষ্ঠান ।

আজি বঙাইগাঁওত অসম প্ৰদেশ কংগ্ৰেছ নেতৃত্বৰ মত বিনিময় সভা অনুষ্টিত হৈ যায় । বঙাইগাঁও সদৰ চহৰৰ ৭ নম্বৰ ৱাৰ্ডত অনুষ্ঠিত এই মত বিনিময় সদ্য প্ৰকাশিত এন আৰ চিৰ চুড়ান্ত তালিকাৰ পৰা বাদ পৰি যোৱা ভাৰতীয় লোক সকলৰ সৈতে হয় । প্ৰদেশ কংগ্ৰেছৰ সভাপতি ৰিপুন বৰা, ৰকিবুল হুচেইন, কেবাজনক বিধায়ক এই মত বিনিময় অনুষ্ঠানত উপস্থিত থাকে । এন আৰ চিৰ পৰা বাদ পৰা প্ৰতিজন ভাৰতীয় নাগৰিকৰ নাম এন আৰ চিত অন্তৰ্ভূক্ত হ'বই লাগিব আৰু তাৰ বাবে সকলো ধৰনৰ আইনী সহায় আগবঢ়াব প্ৰদেশ কংগ্ৰেছে । কিদৰে নিজৰ নাম বাদ পৰা লোকসকলে এন আৰ চিত অন্তৰ্ভূক্ত কৰিবলৈ আগবাঢ়িব লাগিব সেই বিষয়ে বিতং আলোচনা কৰে প্ৰদেশ কংগ্ৰেছ নেতৃত্বই । তাৰ পিচতে প্ৰদেশ কংগ্ৰেছৰ সভাপতি সহ আটাইকেইজন লোকে বঙাইগাঁও আৱৰ্ত ভৱনত আহাৰ গ্ৰহন কৰে । বঙাইগাঁও আৱৰ্তভৱনত প্ৰদেশ কংগ্ৰেছ নেতৃত্বই সংবাদ মাধ্যমৰ সৈতে মত বিনিময় কৰি সভাপতি ৰিপুন বৰাই অসম চৰকাৰক সমালোচনা কৰি গুধুত্বপুৰ্ণ মন্তব্য কৰে ।

প্ৰাক্তন মন্ত্ৰী ৰকিবুল হুচেইনেও অসম চৰকাৰক সমালোচনা কৰি কয় যে, অসম চৰকাৰ সকলোতেই বিফল হৈছে । আৰক্ষীক ব্যৱহাৰ কৰি বিভিন্ন ঠাইত কংগ্ৰেছী লোকক আক্ৰমন কৰাৰ গুৰুত্বপুৰ্ণ অভিযোগ উত্থাপন কৰে ৰকিবুল হুছেইনে । যেতিয়া চৰকাৰে আৰক্ষীক ব্যৱহাৰ কৰি অন্যায় কৰে তাৰ পিচত আৰক্ষীয়ে অন্যায় কৰিলে চৰকাৰে ব্যৱস্থা ল'ব নোৱাৰে বুলিয়ো কয় । অনাহকত নিৰীহক হাৰাশাস্তি বন্ধৰ দাবী জনাই দোষীৰ শাস্তি বিচাৰে । পুজাৰ সময়ত দুখীয়া মানুহৰ সমস্যা সমাধানৰ বাবে চৰকাৰে ব্যৱস্থা লওক বুলিয়ো কয় ৰকিবুল হুচেইনে ।

অসমৰ প্ৰতিটো প্ৰান্ততেই প্ৰদেশ কংগ্ৰেছে যিসকল প্ৰকৃত ভাৰতীয় লোকৰ নাম এন আৰ চিৰ পৰা কৰ্তন কৰা হৈছে তেওঁলোকৰ সৈতে মত বিনিময় কৰাৰ কথা জানিবলৈ দিয়ে প্ৰদেশ কংগ্ৰেছৰ সভাপতি গৰাকীয়ে । দিকবিদিক হেৰুৱা দৰিদ্ৰ ভাৰতীয় সকলো লোকক এন আৰ চিত নাম অন্তৰ্ভূক্তিৰ বাবে কংগ্ৰেছে কাম কৰিব বুলিও কয় সভাপতি ৰিপুন বৰাই ।