নিচাসক্ত পুত্ৰই আক্ৰমণ চলালে পিতৃ-মাতৃক

অভয়াপুৰীৰ দেওহাটীৰ দত্তপাৰাত শনিবাৰে নিশা এজন যুৱকে নিচাজাতীয় সামগ্ৰী সেৱন কৰি সন্ত্ৰাসৰ সৃষ্টি কৰে ৷ ঘটনা অনুসৰি ২৫ বছৰীয়া চন্দন ৰায় নামৰ যুৱক জনে হাতত দা আৰু মাছ মৰা জোং লৈ হঠাৎ উন্মাদ হৈ পৰে ।

অভয়াপুৰী, 25 জুলাই : ৰাজ্যত যি সময়ত মুখ্যমন্ত্ৰী ড৹ হিমন্ত বিশ্ব শৰ্মাই (HIMNTA BISWA SARMA) ড্ৰাগছকে ধৰি নিচাজাতীয় সামগ্ৰীৰ প্ৰচলন নিষিদ্ধ কৰিবৰ বাবে আৰক্ষী- প্ৰশাসনক (POLICE AND ADMINISTRATIONS) কঠোৰ নিৰ্দেশ প্ৰদান কৰিছে ৷ তেনে সময়তে ৰাজ্যৰ বিভিন্ন প্ৰান্তৰ পৰা কোটি কোটি টকাৰ নিচাজাতীয় সমাগ্ৰী উদ্ধাৰ কৰাৰ লগতে সৰবৰাহকাৰীকো আটক কৰিবলৈ সক্ষম হৈছে অসম আৰক্ষী ৷ মুখ্যমন্ত্ৰীৰ নিৰ্দেশৰ পাছতে তৎপৰ হৈ পৰিছে আৰক্ষী ৷

এই নিচাজাতীয় সামগ্ৰীয়ে অমানিশা নমাই আনিছে বহু পৰিয়াললৈ ৷ ড্ৰাগছে অকলতে ধ্বংসৰ মুখলৈ ঠেলি দিছে অলেখ উঠি অহা প্ৰজন্মক ৷ এই নিচাৰ বাবেই বঙাইগাঁও জিলাৰ অভয়াপুৰীৰ দেওহাটীৰ দত্তপাৰাত সংঘটিত হৈছে এটা চাঞ্চল্যকৰ ঘটনা ৷

লগতে পঢ়ক :মোৰ কন্যা সন্তানটিক কুকুৰক খাবলৈ দলিয়াই দিছিল স্বামীয়ে !

শনিবাৰে নিশা এজন যুৱকে নিচাজাতীয় সামগ্ৰী সেৱন কৰি সন্ত্ৰাসৰ সৃষ্টি কৰে অঞ্চলটোত ৷ ২৫ বছৰীয়া চন্দন ৰায় নামৰ যুৱকজনে হাতত দা আৰু মাছ মৰা জোং লৈ হঠাৎ উন্মাদ আচৰণ কৰে ।

তাৰপাছতে নিজ বাসগৃহত মাতৃক মাৰ ধৰ কৰি গাওঁবাসীক আক্ৰমণ কৰিবলৈ ওলাই আহে উদণ্ড যুৱকজন । যুৱকজনৰ উন্মাদ ৰূপ দেখি উপায়ন্তৰ হৈ পৰিয়াল তথা গাওঁবাসীয়ে আৰক্ষীক খবৰ দিয়ে ৷ খবৰ পাইয়ে ঘটনাস্থলীত আৰক্ষী উপস্থিত হয় ৷

লগতে পঢ়ক :হোজাইত গাঞ্জাসহ আটক সৰবৰাহকাৰী

আৰক্ষীয়েও উন্মাদ যুৱকজনক বুজনি দিবলৈ ধৰে যদিও শান্ত কৰিব নোৱাৰিলে । বৰং আৰক্ষীৰ ওপৰতহে আক্ৰমণাত্মক হৈ পৰে যুৱক জন ৷ যাৰফলত বিবুধিত পৰে আৰক্ষী ৷

কিন্তু অভয়াপুৰী আৰক্ষী (abhayapuri police stations) চকীৰ ভাৰপ্ৰাপ্ত আৰক্ষী বিষয়া নিখিল ৰাজখোৱাই কৌশলেৰে যুৱক জনক কৰায়ত্ব কৰিবলৈ সক্ষম হয় যদিও যুৱক জনৰ আক্ৰমণত আহত হয় আৰক্ষী বিষয়া গৰাকী ৷ এই ঘটনাটো সংঘটিত হোৱাৰ মূলতে হৈছে নিচাজাতীয় দ্ৰব্য ৷

লগতে পঢ়ক :গোলাঘাট আৰক্ষীৰ জালত ড্ৰাগছ সৰবৰাহকাৰী

উল্লেখযোগ্য যে, উন্মাদ যুৱক জনে বহু দিনৰ পৰাই গাঞ্জা সেৱন কৰি আহিছিল ৷ প্ৰত্যেক দিনৰ দৰে শনিবাৰে নিশাও গাঞ্জা সেৱন কৰি যুবকে জনে এই অনাকাংক্ষিত কাণ্ড সংঘটিত কৰে বুলি সদৰি কৰিছে আৰক্ষীয়ে ৷ সেয়া যিয়ে নহওক কিয় শনিবাৰে নিশা এক পাঁচ ঘন্টা সময় জুৰি এক শ্বাসৰুদ্ধকৰ পৰিৱেশ সৃষ্টি কৰি চন্দন ৰায় নামৰ যুৱকেজনে গাঁওবাসীক আতংকিত কৰি ৰাখিছিল ৷

লগতে পঢ়ক :বাইহাটাত ন-বোৱাৰীৰ ৰহস্যজনক মৃত্যু