বিশ্বনাথত ভয়ংকৰ পথ দূৰ্ঘটনাঃ থিতাতে নিহত দুই যুৱক

শনিবাৰে নিশা প্ৰায় ৮ বজাত বিশ্বনাথৰ 15 নং ৰাষ্ট্ৰীয় ঘাইপথত সংঘটিত হয় পথ দূৰ্ঘটনা ৷ এই দূৰ্ঘটনাৰ ফলত ঘটনাস্থলীতে নিহত হয় দুজনকৈ যুৱক ৷

বিশ্বনাথ ৩১ মে':বিশ্বনাথৰ 15 নং ৰাষ্ট্ৰীয় ঘাইপথত শনিবাৰে সংঘটিত হয় ভয়ংকৰ পথ দূৰ্ঘটনা ৷ দূৰ্ঘটনাত থিতাতে নিহত হয় দুজনকৈ যুৱক ৷ নিহত যুৱক দুজন ক্ৰমে বিশ্বনাথ চাৰিআলিৰ বামগাঁৱৰ কুশল কলিতা আৰু শিৱসাগৰৰ ৰমেন গগৈ বুলি জানিব পৰা গৈছে ৷

প্ৰত্যক্ষদৰ্শীৰ মতে, পথৰ কাষতে ৰাখি থোৱা এখন সামগ্ৰী কঢ়িওৱা বাহনত তীব্ৰ বেগত অহা AS-12 C-3570 নম্বৰ বাইকখনে খুন্দা মাৰে ৷ ঘটনাস্থলীত বিশ্বনাথ চাৰিআলি যান-বাহন শাখাৰ আৰক্ষীৰ দল উপস্থিত হৈ আহত দুই বাইক আৰোহীক বিশ্বনাথ চাৰিআলি অসামৰিক চিকিৎসালয়লৈ প্ৰেৰণ কৰে যদিও, চিকিৎসকে তেওঁলোকক মৃত বুলি ঘোষণা কৰে ৷

নিহত ৰমেন গগৈ পাৱাৰগ্ৰীডৰ কৰ্মচাৰী বুলি জানিব পৰা গৈছে ৷ আনহাতে নিহত কুশল কলিতা বিশ্বনাথ চাৰিআলি সদৌ অসম ছাত্র সন্থাৰ এজন সক্ৰিয় সদস্য হোৱাত, দেওবাৰে দিনৰ ১২.৩০ বজাত মৃতদেহটো বিশ্বনাথ চাৰিআলি আছু কাৰ্যালয়ৰ সন্মুখত সদস্য সকলে শেষ শ্ৰদ্ধাঞ্জলি জনায় ৷

লগতে পঢ়কঃগণহত্যাঃ পিতৃ ভগ্নীৰ সন্মুখতে মৰিয়াই মৰিয়াই হত্যা যুৱকক