বিশ্বনাথত নিয়ন্ত্ৰণ হেৰুৱাই দলঙৰ তলত পৰিল ট্ৰাক

বৰগাঙত ৰেলিংবিহীন দলঙত চাহপাত ভৰ্তি ট্ৰাক দুৰ্ঘটনাত পতিত ৷ নিয়ন্ত্ৰণ হেৰুৱাই দলঙৰ তলত পৰিল মালবাহী ট্ৰাকখন ৷ এই পথ দুৰ্ঘটনাত কথমপি ৰক্ষা চালক-হেণ্ডিমেনৰ ৷ বৰ্তমানেও সন্ধানহীন হৈ আছে অন্য দুজন লোক ৷

বিশ্বনাথ, 8 আগষ্ট :বিহালী সমষ্টিৰ বৰগাঙত সংঘটিত হৈছে এক ভয়ংকৰ পথ দুৰ্ঘটনা ৷ শুকুৰবাৰে নিশা বৰগাঙৰ ১৫ নং ৰাষ্ট্ৰীয় ঘাইপথত চাহপাত কঢ়িওৱা এখন দহচকীয়া ট্ৰাক দুৰ্ঘটনাত পতিত হয় ৷ নিয়ন্ত্ৰণ হেৰুৱাই শুকানসুঁতি নদীৰ দলঙৰ তলত পৰিল দুৰ্ঘটনাত পতিত হোৱা বাহনখন ৷ এই দুৰ্ঘটনাৰ পাচৰে পৰা সন্ধানহীন হৈ আছে দুজন লোক ৷

প্ৰাপ্ত তথ্য অনুসৰি, বৰগাং কেন্দ্ৰৰ শুকানসুঁতি নদীৰ ওপৰত থকা আৰচিচি দলঙখনৰ নাছিল কোনো ৰেলিং ৷ যাৰ ফলত দুৰ্ঘটনাত পতিত হৈ ট্ৰাকখন পৰি যায় নদীত ৷ এই অভিযোগ কৰিছে অঞ্চলটোৰ ৰাইজে ৷ দুৰ্ঘটনাগ্ৰস্ত এ এছ ০১ জে চি ১৯৪১ নং দহচকীয়া ট্ৰাকখন বিহালীৰ বেগতী চাহ ফেক্টৰীৰ পৰা ৬.৫০ কুইণ্টল চাহ লৈ গুৱাহাটী অভিমুখে আহি আছিল ৷

বিশ্বনাথত ভয়ংকৰ পথ দুৰ্ঘটনা

লগতে পঢ়ক:নগাঁৱত অংগনবাদী কেন্দ্ৰৰ কৰ্মীৰ বিৰুদ্ধে অনিয়মৰ অভিযোগ

দুৰ্ঘটনাগ্ৰস্ত ট্ৰাকখনৰ চালক আৰু হেণ্ডিমেনৰ উপৰিও অতিৰিক্ত দুজন ব্যক্তি আছিল ৷ এই দুৰ্ঘটনাত গুৰুতৰভাৱে আহত হয় চালক আৰু হেণ্ডিমেন ৷ আহত চালক আৰু হেণ্ডিমেনক নিশা বৰগাং মডেল হাস্পতালত ভৰ্তি কৰোৱা হয় ৷ ইফালে বাহনখনত অহা আন লোকৰ কোনো তথ্য লাভ কৰা নাই আৰক্ষীয়ে ৷

লগতে পঢ়ক:পথৰ মেৰামতিৰ দাবীত আছুৰ প্ৰতিবাদ

এই স্থানত দুৰ্ঘটনাত পতিত হৈ এজন লোকে ইতিমধ্যে মৃত্যুকো আঁকোৱলি লৈছে ৷ কিন্তু ইমানৰ পাচতো গুৰুত্ব নাই বিভাগীয় কৰ্তৃপক্ষৰ । এই অভিযোগ কৰিছে বৰগাঙবাসী ৰাইজে ৷ ইফালে দলংখনত অতি শীঘ্ৰে ৰেলিং দিয়াৰ ব্যৱস্থা কৰিবলৈ দাবী জনাইছে স্থানীয় ৰাইজে ৷

লগতে পঢ়ক:গোচৰ দিবলৈ যোৱা মহিলাক আৰক্ষীৰ অপমানৰ অভিযোগ