ৰাষ্ট্ৰীয় পৰ্যায়ত জিলিকিল ৰঙাপৰাৰ ছয় গৰাকী খেলুৱৈ

শিলচৰত টাইকোৱানডো সন্থাই আয়োজন কৰা ' ইণ্ডো বাংলা ফ্ৰেণ্ডশ্বিপ টাইকোৱানডো প্ৰতিযোগিতা'ত অংশগ্ৰহণ কৰি চাৰিটা সোণৰ পদক আৰু দুটা ব্ৰঞ্জৰ পদক লাভ ৰঙাপৰাৰ খেলুৱৈৰ ৷

ৰঙাপৰা, 17 চেপ্তেম্বৰঃ শোণিতপুৰ জিলাৰ ৰঙাপৰালৈ গৌৰৱ কঢ়িয়াই আনিছে ছয় গৰাকী খেলুৱৈয়ে ৷ ৰাষ্ট্ৰীয় টাইকোৱানডো প্ৰতিযোগিতাত চাৰিটা সোণৰ পদক আৰু দুটা ব্ৰঞ্জৰ পদক লাভ খেলুৱৈ কেইগৰাকীৰ ৷ শিলচৰত টাইকোৱানডো সন্থাই আয়োজন কৰা ' ইণ্ডো বাংলা ফ্ৰেণ্ডশ্বিপ টাইকোৱানডো প্ৰতিযোগিতা'ত অসমৰ বিভিন্ন জিলাৰ লগতে শোণিতপুৰ জিলাৰ হৈ ৰঙাপৰাৰ সাত গৰাকী খেলুৱৈয়ে প্ৰতিযোগিতাত অংশ গ্ৰহণ কৰিছিল । ৰঙাপৰাৰ প্ৰশিক্ষক ববিতা ৰাজবংশী আৰু জোনমণি বড়োৰ নেতৃত্বত যোৱা সাত জনীয়া দলটোৰ ছয় গৰাকী খেলুৱৈৰ ভিতৰত চাৰি গৰাকীয়ে সোণৰ আৰু দুগৰাকীয়ে ব্ৰঞ্জৰ পদক লাভ কৰিবলৈ সক্ষম হয় ৷

খেলুৱৈ কেই গৰাকীৰ ভিতৰত ক্ৰমে নেহাল দাসে 25 কেজি শাখাত, যোগেশ নাগবংশীয়ে 45 কেজি শাখাত, বৰলা বৰ্মনে 46 কেজি শাখাত আৰু ইফতিকাৰ হুছেইনে 55 কেজি শাখাত সোণৰ পদক লাভ কৰে ৷ আনহাতে ৰাজেন ওৰাং আৰু চিন্টু লোহাৰে ব্ৰঞ্জ পদক লাভ কৰিবলৈ সক্ষম হয় ৷

সোমবাৰে খেলুৱৈ কেই গৰাকীয়ে ৰে'ল যোগে আহি ৰঙাপৰা ৰে'লৱে ষ্টেচনত উপস্থিত হোৱাৰ লগে লগে দলটোক অসম জাতীয়তাবাদী যুৱ ছাত্ৰ পৰিষদ, আছা, আটছা আৰু চাহ মজদুৰ সংঘই উষ্ম আদৰণি জনায় ।