চতিয়া, 17 জুনঃ দুদিনৰ পিচতো উদ্ধাৰকাৰী বাহিনীয়ে সন্ধান উলিয়াব পৰা নাই দিকৰাই নৈত উটি যোৱা কিশোৰৰ ৷ চাইকেল সহিতে পথ পাৰ হ'ব লঁওতেই দিকৰাই নৈৰ পানীয়ে উটুৱাই নিছিল নাগশংকৰৰ নাঁওতেলীয়া গাঁৱৰ নিতুল ওৰাং নামৰ কিশোৰজনক ৷
সোমবাৰে পুৱাৰ পৰাই চলোৱা উদ্ধাৰ অভিযানৰ অন্তত উদ্ধাৰকাৰী দলে কিশোৰটিৰ লগত নিয়া চাইকেল মোনাখন উদ্ধাৰ কৰিবলৈ সক্ষম হৈছে ৷ কিন্তু সন্ধানহীন কিশোৰটিক উদ্ধাৰ কৰিবলৈ ব্যৰ্থ হয় উদ্ধাৰকাৰী বাহিনী ৷ উদ্ধাৰ অভিযানত অংশ লৈছে এছ ডি আৰ এফৰ লগতে এন ডি আৰ এফৰ অভিজ্ঞ দল ৷ স্থানীয় ৰাইজৰ অভিযোগ অনুসৰি, সেই স্থানত এখন দলং নথকাৰ বাবেই এই শোকাৱহ ঘটনাটো সংঘটিত হ'বলৈ পায় ৷
