প্ৰথম বিশ্বনাথ চলচ্চিত্ৰ মহোৎসৱ
৮ আগষ্টৰ পৰা চাৰিদিনীয়া কাৰ্যসূচীৰে আয়োজন কৰিবলৈ লোৱা হৈছে প্ৰথম বিশ্বনাথ চলচ্চিত্ৰ মহোৎসৱ ৷ এই সমাৰোহৰ উদ্বোধনী অনুষ্ঠানত বিশিষ্ট অতিথিৰূপে অংশগ্ৰহণ কৰিব আন্তঃৰাষ্ট্ৰীয় খ্যাতিসম্পন্ন চলচ্চিত্ৰ নিৰ্মাতা ডাঃ সান্ত্বনা বৰদলৈয়ে আৰু উন্মোচনী ছবি হিচাপে প্ৰদৰ্শন কৰা হ'ব ডাঃ বৰদলৈৰ বহুচৰ্চিত ছবি “মাজ ৰাতিৰ কেতেকী”
বিশ্বনাথ, 3 আগষ্টঃ ৰূপকোঁৱৰ জ্যোতিপ্ৰসাদ আগৰৱালাই জয়মতী চলচ্চিত্ৰৰ দ্বাৰা অসমীয়া চলচ্চিত্ৰৰ গৌৰৱময় ইতিহাসৰ প্ৰথমটো বীজ ৰোপণ কৰা পূৰ্বৰ দৰং,পৰৱৰ্তী কালৰ শোণিতপুৰ আৰু বৰ্তমানৰ নৱগঠিত বিশ্বনাথ জিলাৰ ইতিহাসত পোনপ্ৰথমবাৰৰ বাবে জিলাখনৰ কেইগৰাকীমান চিনেপ্ৰেমীৰ ঐকান্তিক প্ৰচেষ্টাত অহা ৮ আগষ্টৰ পৰা চাৰিদিনীয়া কাৰ্যসূচীৰে আয়োজন কৰিবলৈ লোৱা হৈছে প্ৰথম বিশ্বনাথ চলচ্চিত্ৰ মহোৎসৱৰ। বিশ্বনাথ জিলাৰ উপায়ুক্তৰ কাৰ্যালয়ত শুকুৰবাৰে আয়োজিত এক সংবাদমেলত এই কথা আনুষ্ঠানিকভাৱে ঘোষণা কৰা হয়। ৮ আগষ্টৰ বিয়লি দুই বজাত এই সমাৰোহৰ উদ্বোধনী অনুষ্ঠানত বিশিষ্ট অতিথিৰূপে অংশগ্ৰহণ কৰিব আন্তঃৰাষ্ট্ৰীয় খ্যাতিসম্পন্ন চলচ্চিত্ৰ নিৰ্মাতা ডাঃ সান্ত্বনা বৰদলৈয়ে ৷ উদ্বোধনী অনুষ্ঠানৰ পিছতেই মহোৎসৱৰ উন্মোচনী ছবি হিচাপে প্ৰদৰ্শন কৰা হ'ব ডাঃ বৰদলৈৰ বহুচৰ্চিত ছবি “মাজ ৰাতিৰ কেতেকী” ৷ সমাৰোহত প্ৰদৰ্শিত হবলগীয়া আন আন ছবিসমূহ হৈছে অনুপম কৌশিক বৰাৰ বৰনদী ভটিয়ায়,ভাস্কৰ হাজৰিকাৰ কথানদী, কংকন ডেকাৰ বিউটিফুল লাইভছ,দীপ চৌধুৰীৰ আলিফা,জয়চেং জয় দহোটীয়াৰ হান্দুক,মঞ্জুল বৰুৱাৰ কানীন, হিমজ্যোতি তালুকদাৰৰ কেলেণ্ডাৰ, বিশ্বজিত বৰাৰ ফেহুঁজালি আৰু ৰীমা বৰাৰ বকুল ৷ পঞ্জীয়নৰ প্ৰ-পত্ৰসমূহ বিশ্বনাথ চাৰিআলিৰ স্বস্তিকা প্ৰিণ্টাৰ্ছ,জুইচ বক্স,য়াম্মী কিটচেন,গ্ৰীণ চিলি ৰেষ্টুৰেণ্ট,ভোডাফোন,ৰয়েল পেলেচ আৰু পাপু ৰিফিলছ,বৰগাঙৰ শুভম হোটেল,গহপুৰৰ বিশাল হোটেল,কলাবাৰীৰ শইকীয়া বুক ষ্টল,চতিয়াৰ বক্সি হোটেল আৰু জামুগুৰিহাটৰ জয় হিন্দ পি চি অ’ত উপলব্ধ হব ৷ পঞ্জীয়ন পত্ৰ বিশ্বনাথ চাৰিআলিৰ জনসংযোগ কাৰ্যালয় তথা চক্ৰ বিষয়াৰ কাৰ্যালয়তো উপলব্ধ হ'ব ৷ কাইলৈৰে পৰা পঞ্জীয়ন প্ৰক্ৰিয়া অনলাইনযোগেও আৰম্ভ কৰা হ'ব। মহোৎসৱৰ লগত সংগতি ৰাখি চিনেমাৰ প্ৰতি আগ্ৰহী ছাত্ৰ-ছাত্ৰীসকলৰ বাবে প্ৰতিদিনেই একোটাকৈ মাষ্টাৰ ক্লাছৰো আয়োজন কৰা হৈছে। ছবি নিৰ্দেশনা,অভিনয়,চিত্ৰ-নাট্য ৰচনা আৰু চিত্ৰগ্ৰহণ– এই চাৰিটা বিষয়ত ৰাজ্য আৰু ৰাজ্যৰ বাহিৰৰ বিশেষজ্ঞ ব্যক্তিয়ে প্ৰশিক্ষণ আগবঢ়াবলগীয়া এই শ্ৰেণীসমূহ হ'ব সম্পূৰ্ণ বিনামূলীয়া। মহোৎসৱৰ লগত সংগতি ৰাখি স্থানীয় উদীয়মান ফটোগ্ৰাফাৰসকলৰ এক চিত্ৰ প্ৰদৰ্শনীৰো আয়োজন কৰা হৈছে। বিশ্বনাথ জিলা প্ৰশাসনৰ লগতে ৰাজ্য চৰকাৰৰ সাংস্কৃতিক সঞ্চালকালয় আৰু তথ্য আৰু জনসংযোগ সঞ্চালকালয়েও এই মহোসৱলৈ সকলোধৰণে সহযোগিতা আগবঢ়াইছে ৷