বিশ্বনাথ, 5 মাৰ্চ:27 মাৰ্চত অনুষ্ঠিত হ'ব অসম বিধানসভা নিৰ্বাচনৰ প্ৰথম পৰ্যায়ৰ নিৰ্বাচন ৷ নিৰ্বাচনৰ বাবে প্ৰাৰ্থীত্ব প্ৰত্যাশী সকলে এতিয়া গুৱাহাটীত বাহৰ পতাৰ লগতে ৰাজনৈতিক দলসমূহৰ ইখনৰ পাছত সিখনকৈ বৈঠকো অনুষ্ঠিত হৈছে ৷ বৃহস্পতিবাৰে গুৱাহাটীত কংগ্ৰেছৰ মিত্ৰজোঁটৰ দল তথা 'কা' বিৰোধী একাংশ দলৰ মাজত হোৱা বৈঠকৰ অন্ত পৰাৰ পাছত বিশ্বনাথ জিলাৰ 77 নং বিহালী বিধান সভা সমষ্টিত মহাজোঁটৰ প্ৰাৰ্থী হিচাপে কংগ্ৰেছ দলে চি পি আই(এম এল) দলৰ নেতা বিবেক দাসক এৰি দিয়ে ৷
বৰ্তমান অসম চৰকাৰৰ কেবিনেট মন্ত্ৰী তথা বিজেপি বিধায়ক ৰঞ্জিত দত্তৰ দখলত থকা সমষ্টিটো মহাজোঁটৰ প্ৰাৰ্থী হিচাপে চি পি আই (এম এল) দলক এৰি দিয়াত চিপিআই (এম এল) দল আৰু কংগ্ৰেছ কৰ্মী সকল উৎফুল্লিত হৈ পৰা পৰিলক্ষিত হয় ৷ উল্লেখ্যে যে, ১,২৩,২৭৯ গৰাকী ভোটাৰ থকা সমষ্টিটোত বিগত 2016 চনৰ বিধান সভা নিৰ্বাচনত কংগ্ৰেছ দলে 28,551 ভোট লাভ কৰা বিপৰীতে চি পি আই (এম এল) দলে 8,025 টা ভোট লাভ কৰিছিল । সমষ্টিটোৰ বৰ্তমানৰ বিজেপি দলৰ বিধায়ক তথা মন্ত্ৰী ৰঞ্জিত দত্তই 52152 টা ভোট লাভ কৰি বিধায়কৰ আসন দখল কৰিবলৈ সক্ষম হৈছিল ।