বিশ্বনাথ, 14 ছেপ্তেম্বৰ :বিশ্বনাথৰ ক'ভিড চেণ্টাৰত স্বাস্থ্যকৰ্মীৰ হেমাহিৰ বাবেই এজন ক'ভিড ৰোগীৰ মৃত্যু হোৱাৰ অভিযোগ উত্থাপন হৈছে ৷ জানিব পৰা মতে, বিহালীৰ মিজিকাজান চাহ বাগিছাৰ 12 নং লাইনৰ বৰ্জু নায়ক নামৰ ব্যক্তিজনৰ জ্বৰ হৈ থকাৰ বাবে দেওবাৰে পুৱা 7 বজাত পুত্ৰই আনিছিল বিশ্বনাথ চাৰিআলিৰ ক'ভিড চেণ্টাৰলৈ । কিন্তু 7 বজাতে আহি ক'ভিড চেণ্টাৰত উপস্থিত হোৱা ব্যক্তিজনক দিনৰ 10 বজালৈকে চিকিৎসাকৰ্মীয়ে পৰীক্ষা নকৰাৰ অভিযোগ পুত্ৰৰ ৷
বহু সময় ধৰি চিকিৎসাকৰ্মীয়ে ৰোগী গৰাকীক কোনো ধৰণৰ গুৰুত্ব নিদিয়াৰ বাবে পুত্ৰই উপায়ন্তৰ হৈ ফোন কৰে সাংসদ পল্লৱ লোচন দাসক ৷ পৰৱৰ্তী সময়ত সাংসদ পল্লৱ লোচন দাসৰ ধমক খাই চিকিৎসাকৰ্মী সকল তৎপৰ হয় যদিও লোকজনৰ স্বাস্থ্যৰ অধিক অৱনতি ঘটাত বিশ্বনাথ ক'ভিড চেন্টাৰৰ নিচেই গাতে লাগি থকা বিশ্বনাথ অসামৰিক চিকিৎসালয়লৈ লৈ যোৱা হয় যদিও ব্যক্তিজন বিনা চিকিৎসাই মৃত্যুবৰণ কৰে । যাৰ বাবে ভৰিৰ বিষ আৰু জ্বৰত আক্ৰান্ত হৈ থকা ৰোগী গৰাকী চিকিৎসাকৰ্মীৰ হেমাহিৰ বাবে ৰোগীজনে মৃত্যুক সাৱটি লোৱাৰ অভিযোগ উত্থাপন হৈছে ৷