বিশ্বনাথ, ১৯ জুনঃবিনোদ ৰাজগড় হত্যাকাণ্ডৰ নতুন মূৰ ৷ বিনোদ ৰাজগড় মৃত্যু সন্দৰ্ভত বিশ্বনাথ আৰক্ষীয়ে বৃহস্পতিবাৰে গ্ৰেপ্তাৰ কৰে গোবলাই বসুমতাৰী, বিশ্বজিৎ দৈমাৰী,কমল বসুমতাৰীক ৷ লগতে তেওঁলোকৰ পৰা আৰক্ষীয়ে জব্দ কৰে দুটা হাতে সজা বন্দুক, ১৬ টা লিডৰ টুকুৰা ,৪০ টা ঘূৰণীয়া লিডৰ টুকুৰা গোটা গুলি বনোৱা সামগ্ৰী,তিনিটা টেমাত গুলি বনোৱা খাৰ l আনহাতে,আৰক্ষীৰ সোধপোছত বিশ্বজিৎ দৈমাৰীয়ে প্ৰকাশ কৰা তথ্য অনুসৰি, ১৫ জুনৰ পুৱা কমল বসুমতাৰীৰ গৃহৰ পৰা এটা বন্ধুক লৈ চিকাৰলৈ ওলাই গৈছিল বিনোদ ৰাজগড়, বিশ্বজিৎ দৈমাৰী ওৰফে সোমাইনা আৰু গবলাই বসুমতাৰী ৷
চিকাৰৰ সময়ত বিশ্বজিৎ দৈমাৰীয়ে অসাৱধানতাত চলোৱা গুলিয়ে বিনোদ ৰাজগড়ৰ প্ৰাণ লৈছিল ৷ শুকুৰবাৰে বিশ্বনাথ আৰক্ষীয়ে এক সংবাদ মেলৰ জৰিয়তে এই বিষয়ে জানিবলৈ দিয়ে ৷ দৰাচলতে, ১৫ জুনত বিশ্বনাথ জিলাৰ অসম-অৰুণাচল প্ৰদেশ সীমান্তৱৰ্তী অঞ্চল পাচলগীত দুস্কৃতিকাৰীয়ে গুলীয়াই হত্যা কৰিছিল বিনোদ ৰাজগড় নামৰ লোকজনক । এই ঘটনা সন্দৰ্ভত গোবলাই বসুমতাৰী,বিশ্বজিৎ দৈমাৰী ওৰফে সোমাইনা আৰু কমল বসুমতাৰীক গ্ৰেপ্তাৰ কৰি তদন্ত আৰম্ভ কৰিছিল আৰক্ষীয়ে ৷ উল্লেখযোগ্য যে পূৰ্বে বিনোদ ৰাজগড় আৰু সোমাইনা বসুমতাৰী খৰি কাটিবলৈ অসম অৰুণাচল সীমান্তত যোৱা বুলি পৰিয়ালৰ লোকে প্ৰকাশ কৰিছিল ৷ কিন্তু শেহতীয়াকৈ বিশ্বনাথ আৰক্ষীৰ তদন্তত প্ৰকাশ পোৱা তথ্য অনুসৰি বিনোদ ৰাজগড় প্ৰকৃততে বন্ধুৰ সৈতে চিকাৰ কৰিবলৈ গৈ মৃত্যুমুখত পৰিছিল ।