পত্নীক বিবস্ত্ৰ কৰি স্বামীয়ে ভাইৰেল কৰিলে ভিডিঅ’

কোনো অশিক্ষিত তথা পিছপৰা সমাজত নহয় এইবাৰ মহানগৰী গুৱাহাটীত সংঘটিত হৈছে যৌতুকৰ বাবে বোৱাৰী নিৰ্যাতনৰ ঘটনা ৷ উপায়ন্তৰ হৈ স্বামীৰ বিৰুদ্ধে পত্নীয়ে ৰুজু কৰিছে গোচৰ ৷

বৰপেটা, 24 জুলাই : ক'ভিড মহামাৰীৰ আতংক অব্যাহত থকাৰ মাজতে মহানগৰী গুৱাহাটীৰ ধীৰেণপাৰাত সংঘটিত হৈছে শিক্ষিত সমাজক লজ্জানত কৰা এক ঘটনা ৷ যৌতুকৰ দাবীৰ ধীৰেণপাৰাৰ মানকাটাৰ এজন ব্যক্তিয়ে নিজ পত্নীক অকথ্য নিৰ্যাতন চলোৱাৰ ঘটনা পোহৰলৈ আহিছে ৷ উপায়ন্তৰ হৈ ইতিমধ্যে স্বামীৰ বিৰুদ্ধে ফটাশিল থানাত এজাহাৰ দাখিল কৰিছে পত্নীয়ে ৷ ঘটনাকৈ লৈ সমগ্ৰ অঞ্চলটোতে সৃষ্টি হৈছে তীব্ৰ প্ৰতিক্ৰিয়াৰ ৷

উল্লেখ্য যে, শেহতীয়াকৈ স্বামীৰ অত্যাচাৰত অতিষ্ঠ হৈ ভুক্তভোগী মহিলাগৰাকীয়ে বৰপেটাৰ বিষ্ণুপুৰৰ নিজ পিতৃগৃহত আশ্ৰয় লৈ থাকিবলগীয়া হোৱাৰ ঘটনা সংঘটিত হৈছে ৷ স্বামীৰ অত্যাচাৰত শৰীৰৰ বিভিন্ন স্থানত গুৰুতৰভাৱে আঘাত পাইছে মহিলা গৰাকীয়ে ৷ মহিলা গৰাকীয়ে উত্থাপন কৰা অভিযোগ মতে বিয়াৰ পিচৰপৰাই স্বামীয়ে কাঠৰ ফাৰ্ণিচাৰৰ অজুহাত, নগদ ধন আদি বিচাৰি তেঁওৰ ওপৰত শাৰীৰিক আৰু মানসিক অত্যাচাৰ চলাই আহিছে ৷

আনকি নিৰ্যাতনৰ সকলো সীমা অতিক্ৰম কৰি তেঁওক বিবস্ত্ৰ কৰি মাৰপিট কৰাৰ লগতে সেইয়া ভিডিঅ' কৰি ভাইৰেল কৰা বুলিও অভিযোগ উত্থাপন কৰিছে ভুক্তভোগী মহিলা গৰাকীয়ে ৷

আনহাতে, কেইদিনমান পূৰ্বে কেৰাচিন তেল ঢালি মহিলাগৰাকীক জ্বলাই দিয়াৰ চেষ্টা চলোৱাৰ সময়তে নিজ সন্তানক লগত লৈ কোনোমতে পলাই আহি বৰপেটাৰ বিষ্ণুপুৰৰ পিতৃগৃহত আশ্ৰয় লৈছে ভুক্তভোগী মহিলাগৰাকীয়ে ৷ স্বামীয়ে উপৰ্যুপৰি চলোৱা অত্যাচাৰত জৰ্জৰিত মহিলাগৰাকীয়ে শনিবাৰে ফটাশিল থানাত এজাহাৰ দাখিল কৰি ইয়াৰ উচিত ন্যায় বিচাৰিছে ৷ ঘটনা সন্দৰ্ভত আৰক্ষীয়ে কোনোধৰণৰ ব্যৱস্থা গ্ৰহণ কৰে সেইয়া সময়ততে পৰিলক্ষিত হ'ব ৷

উল্লেখ্য যে, যৌতুকজনিত কাৰণতেই হওক বা অন্যান্য কাৰণতেই হওক বোৱাৰী নিৰ্যাতনৰ দৰে জঘণ্য ঘটনা ৰোধ কৰাৰ বাবে বিভিন্ন মহিলা সংগঠন তথা বেচৰকাৰী সংস্থাই অহৰহ চেষ্টা চলাই আছে ৷ তথাপি কিন্তু সমাজত বোৱাৰী নিৰ্যাতনৰ দৰে ঘটনা অনিয়ন্ত্ৰিত অৱস্থাতেই আছে ৷ গুৱাহাটী মহানগৰাৰী শিক্ষিত সমাজত সংঘটিত হোৱা এই ঘটনাই যেন পুনৰ উদঙাইছে ৰাজ্যত সংঘটিত হৈ থকা বোৱাৰী নিৰ্যাতনৰ দৰে জঘণ্য ঘটনাৰ প্ৰকৃত ছবি ৷

লগতে পঢ়কঃস্বামীৰ অবৈধ সম্পৰ্কৰ বাবে আৰক্ষীৰ কাষ চাপিল পত্নী