বাক্সা, 21 ডিচেম্বৰঃ জাতিধ্বংসী সংশোধিত নাগৰিকত্ব আইনৰ বিৰুদ্ধে ৰাজ্যত অব্যাহত প্ৰতিবাদী কাৰ্যসূচী ৷ শনিবাৰেও বাক্সা জিলাৰ কুমাৰীকাটা আঞ্চলিক ছাত্র সন্থা আৰু কুমাৰীকাটা আঞ্চলিক নাৰী মুক্তি সংগ্ৰাম সমিতিৰ সহযোগত এই আইন বাতিলৰ দাবীত ছাত্র সন্থাৰ কাৰ্যালয়ৰ চৌহদত অৱস্থান ধৰ্মঘট কাৰ্যসূচী ৰূপায়ণ কৰে। কেন্দ্ৰীয় চৰকাৰ হায় হায়, অসম চৰকাৰ হায় হায়, এই আইন আমি নামানো, এই আইন বাতিল কৰিবই লাগিব, নাৰীশক্তি জিন্দাবাদ, জয় আই অসম, আছু জিন্দাবাদ আদি বিভিন্ন শ্ল’গানেৰে উত্তাল কৰি তোলে সমগ্ৰ পৰিৱেশ ।
বৰমাঃ বৰমাতো উত্তাল প্ৰতিবাদ অব্যাহত নাগৰিকত্ব সংশোধনী আইনৰ বিৰুদ্ধে ৷ বৰমাত নাগৰিক সংশোধনী আইন বিৰোধিতাৰে শতাধিক মহিলাই অৱস্থান ধৰ্মঘট কাৰ্যসূচী ৰূপায়ন ৷ চৰকাৰ বিৰোধী বিভিন্ন শ্ল’গানেৰে উত্তাল কৰি তোলে সমগ্ৰ অঞ্চল ৷
কলিয়াবৰঃ কলিয়াবৰতো সংশোধিত নাগৰিকত্ব আইনৰ বিৰুদ্ধে সদৌ অসম ছাত্ৰ সন্থাৰ উদ্যোগত মহিলা বিক্ষোভ কাৰ্যসূচী ৰূপায়ন কৰা হয় ৷ শতাধিক মহিলাই গীতে-মাতে বিৰোধিতা কৰে সংশোধিত নাগৰিকত্ব আইনৰ ৷ "ৰাইজ আজি ৰাজপথত কৰে হাহাকাৰ", "অমিত শ্বাহ তোমালোকৰ কোন যুগৰ মোমাই", "কেশৱ আমাৰ আপোন বুলি কৰিলো বিশ্বাস, আজিৰ পৰা কেশৱ তোমাৰ নামানো আশ্বাস" আদি গীতৰ ভাষাৰে তীব্ৰ হুংকাৰ কলিয়াবৰীয়া মহিলাসকলৰ।
মৰিয়নীঃৰাজ্যৰ বিভিন্ন ঠাইৰ লগতে মৰিয়নীতো আছুৰ নেতৃত্বত তীব্ৰ প্ৰতিবাদ মহিলা সমাজৰ ৷ মৰিয়নী নগৰৰ থানা তিনিআলিত মহিলাই আজি এই আইনৰ বিৰুদ্ধে মাৰবান্ধি থিয় দি সাব্যস্ত কৰে প্ৰতিবাদ। মৰিয়নী মহাবিদ্যালয়ৰ মহিলা কোষৰ শিক্ষয়িত্ৰীৰ লগতে মৰিয়নী বিভিন্ন অঞ্চলৰ পৰা কেইবাশতাধিক মহিলাই অৱস্থান ধৰ্মঘটৰ জৰিয়তে এই আইন বাতিল কৰিবলৈ দাবী জনায় ৷
বঙাইগাঁওঃবঙাইগাঁও আঞ্চলিক ছাত্ৰ সন্থাৰ উদ্যোগত মহিলাসকলৰ নাগৰিকত্ব সংশোধনী আইন বিৰোধী প্ৰতিবাদী অৱস্থান ধৰ্মঘট । বঙাইগাঁও মাৰোৱাৰী সমাজৰ মহিলাসকলেও অংশগ্ৰহণ কৰি প্ৰতিবাদ সাব্যস্ত কৰে । নাৰীসকলে একমুখে নাগৰিকত্ব সংশোধনী এই আইনৰ বিৰুদ্ধে বাতিল কৰাৰ বাবে দাবী জনায় । কোনোপধ্যেই এই আইন মানি লোৱা নহ’ব বুলিও হুংকাৰ দিয়ে নাৰী সমাজে । বিজেপি নেতত্বাধীন অসম চৰকাৰ আৰু কেন্দ্ৰীয় চৰকাৰক সকীয়াই দিয়ে এই প্ৰতিবাদী কাৰ্যসূচীৰ জৰিয়তে ।