বৰপেটাত বোৱাৰীৰ মৃত্যুক লৈ তীব্ৰ চাঞ্চল্য

বৰপেটা জিলাৰ তাৰাবাৰী আৰক্ষী থানাৰ অন্তৰ্গত খংৰাত বোৱাৰীৰ মৃত্যুক লৈ তীব্ৰ চাঞ্চল্য । স্বামীয়ে হত্যা কৰাৰ অভিযোগ মৃতকৰ পৰিয়ালৰ ।

বৰপেটা , 14 জানুৱাৰী : বৰপেটা জিলাৰ তাৰাবাৰী আৰক্ষী থানাৰ অন্তৰ্গত খংৰাত সংঘটিত হয় এক চাঞ্চল্যকৰ ঘটনা । এগৰাকী বোৱাৰীৰ মৃত্যুক লৈ অঞ্চলটোত সৃষ্টি হৈছে তীব্ৰ চাঞ্চল্যৰ । স্বামীয়ে হত্যা কৰি আত্মহত্যাৰ ৰূপ দিয়াৰ অভিযোগ মৃতকৰ পৰিয়ালৰ । মৃত মহিলাগৰাকীৰ নাম আঞ্জুৱাৰা বেগম ।

সোমবাৰে নিশা নিজ বাসগৃহত গৰুৰ দৰখৰে চিপ লোৱা বুলি স্বামী ইকৰাম আলীয়ে জানিবলৈ দিয়ে । নিশাই স্বামীয়ে মৃতদেহ নমাই থোৱাত সৃষ্টি হৈছে ৰহস্যৰ । প্ৰায় দহ বছৰ পূৰ্বে বিবাহ পাশত আৱদ্ধ হৈছিল আঞ্জুৱাৰা বেগম । বিয়াৰ পিছৰে পৰা স্বামী ইকৰাম আলীয়ে যৌতুকজনিত কাৰণত অত্যাচাৰ কৰাৰ অভিযোগ উত্থাপন কৰিছে মৃতকৰ পৰিয়ালৰ ।

উল্লেখ্য যে, সোমবাৰেও ইকৰাম আলীয়ে পত্নীক অত্যাচাৰ কৰাৰ অভিযোগ উঠিছে । মৃতকৰ শৰীৰত স্পষ্ট হৈ আছে আঘাতৰ চিন । ইতিমধ্যে ঘটনাস্থলীত তাৰাবাৰী আৰক্ষী উপস্থিত হৈ আৰম্ভ কৰিছে তদন্ত । সোধাপোচাৰ বাবে স্বামী ইকৰাম আলীক আৰক্ষীয়ে আটক কৰিছে । আৰক্ষীৰ তদন্তৰ পিছতহে স্পষ্ট হৈ পৰিব এয়া আত্মহত্যা নে পৰিকল্পিত হত্যাকাণ্ড । আৰক্ষীয়ে মৃতদেহ মৰণোত্তৰ পৰীক্ষাৰ বাবে বৰপেটা ফখৰউদ্দিন আলী আহমেদ চিকিৎসা মহাবিদ্যালয় হস্পিতাললৈ প্ৰেৰণ কৰিছে ।

আৰু পঢ়ক :বৰপেটাৰ এখন বিদ্যালয়ত শিক্ষকৰ মইমতালি!