স্বামীৰ পৰকীয়া প্ৰেমৰ বাবে মৃত্যুক সৱতি ল'লে এগৰাকী বোৱাৰীয়ে

কলগাছিয়াৰ শাওৰাচৰা গাঁৱত এগৰাকী বোৱাৰীৰ আত্মহত্যা । পৰকীয়া প্ৰেমৰ বাবেই স্বামীয়ে হত্যা কৰাৰ অভিযোগ পাঁচ মাহৰ কন্যা সন্তানৰ মাতৃ অৰ্থাৎ নিজ পত্নীক। এই অভিযোগ মৃত বোৱাৰীৰ পিতৃ পৰিয়াল আৰু স্থানীয় ৰাইজৰ ।

জনীয়া, 19 নৱেম্বৰ : বৰপেটা জিলাৰ কলগাছিয়া আৰক্ষী থানাৰ অন্তৰ্গত শাওৰাচৰা গাঁৱত এগৰাকী পাঁচমহীয়া কন্যা সন্তানৰ মাতৃৰ অস্বাভাৱিক মৃত্যুৰ ঘটনাই সমগ্ৰ অঞ্চলজুৰি তীব্ৰ চাঞ্চল্যৰ সৃষ্টি কৰিছে । জানিব পৰা মতে, শাওৰাচৰা গাঁৱৰ হজৰত আলিৰ পুত্র নোমাজ আলিৰ লগত বৰপেটাৰোডৰ খৈৰাবাৰী গাঁৱৰ কৰিম আলীৰ কন্যা নুৰজাহানৰ সামাজিক ৰীতি-নীতিৰে বিয়া হৈছিল ।

কিন্তু মৃত বোৱাৰীৰ পিতৃ পৰিয়াল আৰু স্বামী গৃহৰ ওচৰৰ একাংশ লোকে অভিযোগ কৰা অনুসৰি, বিয়াৰ পিছৰে পৰাই বোৱাৰী নুৰজাহানক স্বামী গৃহৰ লোকে শাৰীৰিকভাৱে নানা ধৰণৰ অত্যাচাৰ চলাইছিল ৷ শেহতীয়াকৈ স্বামী নোমাজ আলীয়ে অন্য স্ত্ৰী সৈতে অবৈধ সম্পৰ্ক ৰক্ষা কৰাৰো অভিযোগ উত্থাপন কৰিছে নুৰজাহানৰ পৰিয়ালৰ লোকৰ লগতে একাংশ প্ৰতিবেশী লোকে ৷

একাংশ লোকে সংবাদিকৰ আগত সদৰী কৰা মতে, এনে পৰিপেক্ষিতত স্বামী নোমাজ আলীয়ে পৰকীয়া প্ৰেমৰ বাবেই পৰিকল্পিতভাৱে পাঁচ মাহৰ কন্যা সন্তানৰ মাতৃ অৰ্থাৎ নিজ পত্নী নুৰজাহানক হত্যা কৰে ৷ ইফালে, নোমাজ আলীৰ পৰিয়ালে বোৱাৰীগৰাকীক হত্যা কৰা নাই বুলি মন্তব্য কৰাৰ লগতে আত্মহত্যা কৰা বুলি স্পষ্টীকৰণ দিছে ৷

উল্লেখ্য যে, সম্প্ৰতি স্বামী নোমাজ আলীয়ে পলাতক হৈ আছে বুলি জানিব পৰা গৈছে । ইফালে মৃত নুৰজাহানৰ পিতৃ পৰিয়ালে কলগাছিয়া আৰক্ষী থানাত এখন এজাহাৰ দাখিল কৰিছে বুলি জানিবলৈ দিয়াৰ লগতে ঘটনাৰ উচিত তদন্তৰ জৰিয়তে দোষীক কঠোৰৰ পৰা কঠোৰতম শাস্তিৰ দাবী জনাইছে । লক্ষণীয় যে, এয়া আচলতে এক পৰিকল্পিত হত্যাকাণ্ড নে আত্মহত্যা সেয়া মৰণোত্তৰ পৰীক্ষাৰ প্ৰতিবেদন আৰু আৰক্ষীৰ সঠিক তদন্তৰ জৰিয়তেহে পোহৰলৈ আহিব ।

লগতে পঢ়ক:Farm laws repeal : সংসদত কৃষি আইন বাতিল নোহোৱা পৰ্যন্ত অব্যাহত থাকিব প্ৰতিবাদ