বৰপেটা, ২৯ এপ্ৰিলঃবৰপেটাৰ ব্ৰহ্মপুত্ৰৰ বালি চাপৰিত আৰম্ভ হৈছে অৰ্থনৈতিক বিপ্লৱ ৷ ব্ৰহ্মপুত্ৰ নৈৰ শুকান বালিচৰত ফুলিছে আশাৰ সপোন ৷ নৈৰ বালিচৰত আৰম্ভ হোৱা অভিনৱ কৃষি বিপ্লৱে ৰাজ্যখনলৈ কঢ়িয়াই আনিছে সুদিনৰ সম্ভাৱনা ৷ বৰপেটা জিলাৰ বহৰিৰ সমীপৰ গোমা গাঁৱৰ ব্ৰহ্মপুত্ৰৰ বালিচাপৰিত সূচনা হৈছে এই কৃষি বিপ্লৱৰ ৷
২০০৮ চনত ব্ৰহ্মপুত্ৰৰ প্ৰৱল খহনীয়াত সম্পূৰ্ণৰূপে জাহ গৈছিল বহৰিৰ সমীপৰ গোমা নামৰ গাঁওখন ৷ নৈৰ খহনীয়াত ভেটি মাটি হেৰুৱাই সৰ্বস্বান্ত পৰিয়ালসমূহে আশ্ৰয় লৈছিল আন ঠাইত ৷ এসময়ৰ শস্য শ্যামলা গোমা গাঁও ব্ৰহ্মপুত্ৰৰ বালিচৰত পৰিণত হোৱাৰ পিচত এনেই পৰি ৰৈছিল মাটিবোৰ ৷ বৰ্তমান এই বালিচাপৰিতে এইবাৰ তৰমুজৰ খেতি আৰম্ভ কৰিছে ইব্ৰাহিম আলী নামৰ এজন ব্যক্তিয়ে ৷ গোমা গাঁৱৰ প্ৰায় ৬০০ বিঘা বালি চাপৰিৰ মাটিত ইব্ৰাহিম আলীয়ে কৰিছে তৰমুজৰ খেতি ৷ বালিচৰত এতিয়া যেনিয়েই চোৱা যায় তেনিয়েই দেখা যায় মাথো তৰমুজৰ শুকান গছ আৰু গছত লাগি থকা তৰমুজ ৷ ইতিমধ্যে ৰাজ্যৰ বিভিন্ন জিলাৰ লগতে উত্তৰ পূৰ্বাঞ্চল আৰু দিল্লী, উত্তৰ প্ৰদেশ আদিলৈকো সৰবৰাহ হৈ আছে তৰমুজ ৷
বৰপেটাৰ ব্ৰহ্মপুত্ৰৰ বালি চাপৰিত আৰম্ভ হৈছে কৃষি বিপ্লৱ ব্ৰহ্মপুত্ৰৰ খহনীয়াত বালিচাপৰিত পৰিণত হোৱা মাটিবোৰ শস্য সম্ভৱা কৰি তোলাৰ ক্ষেত্ৰত ইব্ৰাহিম আলী নামৰ চি আৰ পি এফৰ প্ৰাক্তন জোৱানজনক সহায়ৰ হাত আগবঢ়াইছে উত্তৰ প্ৰদেশৰ ৰছিদ নামৰ এজন খেতিয়কে ৷ উত্তৰ প্ৰদেশৰ পৰা অহা কেইবাজনো কৃষকৰ লগতে ৰচিদৰ পৰামৰ্শতে এতিয়া বৰপেটাৰ ব্ৰহ্মপুত্ৰৰ বালিচাপৰিত আৰম্ভ কৰা তৰমুজ খেতিয়ে ৰাজ্যখনত সূচনা কৰিছে এক কৃষি বিপ্লৱৰ ৷ কিয়নো ৰাজ্যৰ হেজাৰ হেজাৰ বিঘা কৃষি ভূমি খহনীয়াৰ ফলত বালিচাপৰিত পৰিণত হৈ এনেই পৰি আছে ৷ এই বালিচাপৰি সমূহত এনেদৰে তৰমুজৰ খেতি কৰি দেশ বিদেশলৈ তৰমুজ ৰপ্তানি কৰি অৰ্থনৈতিকভাৱে লাভৱান হোৱাৰ থল আছে ৰাজ্যৰ নিবনুৱা যুৱক সকলৰ ৷
উল্লেখ্য যে, ৯০ লাখ টকা ব্যয়েৰে ৬০০ বিঘা মাটিত তৰমুজৰ খেতি কৰা ইব্ৰাহিম আলীয়ে প্ৰায় ৫ কোটি টকা উপাৰ্জনৰ আশা কৰিছে ৷ অৱশ্যে লক্ ডাউনৰ বাবে কিছু পৰিমানে ক্ষতিৰ সন্মুখীন হ'বলগীয়া হৈছে খেতিয়কগৰাকী ৷ লক্ষনীয়ভাৱে ৰাজ্যৰ কৃষি ক্ষেত্ৰলৈ এক আশাৰ বতৰা কঢ়িয়াই অনা খেতিয়কগৰাকীয়ে বৰ্তমানলৈকে কৃষি বিভাগৰ পৰা লাভ কৰা নাই কোনোধৰণৰ সুযোগ সুবিধা ৷ বৰপেটাৰ বহৰিৰ গোমা গাঁৱত আৰম্ভ হোৱা তৰমুজৰ খেতিয়ে নিশ্চিতভাৱে ৰাজ্যখনলৈ কঢ়িয়াই আনিব পাৰে সুদিনৰ সম্ভাৱনা ৷ এইক্ষেত্ৰত আগন্তুক দিনত ৰাজ্যৰ কৃষি বিভাগ তৎপৰ হোৱাৰ লগতে ল'ব লাগিব বিশেষ ভূমিকা ৷
লগতে পঢ়কঃঅখিল গগৈৰ মুক্তিৰ অনুৰোধ লৈ প্ৰধানমন্ত্ৰীলৈ মুকলি চিঠি পৰেশ বৰুৱাৰ
