জনীয়া, 4 নৱেম্বৰ :সৰভোগ আৰক্ষী থানাৰ অন্তৰ্গত ধৰ্মপুৰত বুধবাৰে এক ভয়ংকৰ মাৰপিটৰ ঘটনা সংঘটিত হয় । মাৰপিটৰ ঘটনাত আহত হ’ল আবাদী প্ৰাথমিক বিদ্যালয়ৰ শিক্ষক গুলজাৰ হুছেইন । ইয়াকে লৈ সমগ্ৰ অঞ্চল জুৰি সৃষ্টি হৈছে তীব্ৰ চাঞ্চল্যৰ । উল্লেখযোগ্য যে, কলগাছিয়াৰ গুঘুবাৰী গাঁৱৰ গুলজাৰ হুছেইন নামৰ শিক্ষকজনে দুপৰীয়া বিদ্যালয়ৰ পৰা ঘৰ অভিমুখে গৈ আছিল ৷
ঘৰলৈ ওভটা পথতে ধৰ্মপুৰ গাঁৱৰ নুৰু মৌলবী নামৰ এজন ব্যক্তিয়ে শিক্ষকজনক আগভেটি ধৰে ৷ ইয়াৰ পিছতে লোকজনে শিক্ষক হুছেইনক পাথৰেৰে মূৰত আৰু মুখত উপৰ্যুপৰি আক্ৰমণ কৰে ৷ এই আক্ৰমণত গুৰুতৰভাবে আহত হয় গুলজাৰ হুছেইন । ঘটনাৰ লগে লগে স্থানীয় ৰাইজৰ তৎপৰতাত গুৰুতৰ অৱস্থাত শিক্ষক জনক বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়লৈ প্ৰেৰণ কৰা হয় ।
জানিব পৰা মতে, নুৰু মৌলবী নামৰ লোকজনৰ শিক্ষক গুলজাৰ হুছেইনৰ ওপৰত কোনো পুৰণা আখেজ আছিল ৷ অৱশেষত বুধবাৰে তাৰেই প্ৰতিশোধ লোৱাৰ বাবে নুৰুৱে এই ঘটনা সংঘটিত কৰিছে বুলি স্থানীয় ৰাইজে জানিবলৈ দিয়ে । ইতিমধ্যে শিক্ষক গুলজাৰ হুছেইনৰ পৰিয়ালৰ তৰফৰ পৰা নুৰু মৌলবীৰ বিৰুদ্ধে এখন এজাহাৰ দাখিল কৰা হৈছে বুলি জানিব পৰা গৈছে ।
লগতে পঢ়ক :চোৰাং কাঠৰ বেহা : জব্দ বহু লক্ষাধিক টকাৰ কাঠ
