বৰপেটা, 17 অক্টোবৰঃ বৰপেটা চিকিৎসা মহাবিদ্যালয় হাস্পতালৰ সন্মুখৰ পৰা নিশা এজন যুৱক অপহৰণৰ ঘটনা সংঘটিত হৈছে ৷ অপহৰণৰ কেইঘন্টামানৰ ভিতৰতে আৰক্ষীয়ে তৎপৰতাৰে অভিযান চলাই যুৱকজনক উদ্ধাৰ কৰাৰ লগতে তিনি অপহৰণকাৰীক গ্ৰেপ্তাৰ কৰে আৰক্ষীয়ে ৷
বৰপেটা সদৰ থানাৰ আৰক্ষী উপ পৰিদৰ্শক মুক্তাজুৰ ৰহমানৰ নেতৃত্বত অভিযান চলাই অপহৃত যুৱকজনক উদ্ধাৰৰ লগতে তিনি অপহৰণকাৰীক গ্ৰেপ্তাৰ কৰে আৰক্ষীয়ে ৷ আৰক্ষীয়ে অপহৰণ কাণ্ডৰ সৈতে জড়িত থকাৰ অভিযোগত গ্ৰেপ্তাৰ কৰা যুৱক কেইজন হ'ল চেঙা সমষ্টিৰ শিলা গাঁৱৰ হায়দৰ আলী আৰু খুৰচেদ আলী, আৰু পালহাজী গাৱৰ ছাইফুল ইছলাম ৷ শুকুৰবাৰে নিশা বৰপেটা চিকিৎসা মহাবিদ্যালয় হাস্পতালৰ সন্মুখৰ পৰা ধানবন্ধা গাঁৱৰ বিলায়েৎ হুছেইনৰ পুত্ৰ হাবিজুল আলিক অপহৰণ কৰিছিল যুৱককেইজনে ৷ এখন মাৰুতি ছুইফট্ ডিজায়াৰ গাড়ীৰে যুৱকজনক অপহৰণ কৰি নিয়াৰ পিচতেই ম’বাইল ফোন যোগে যুৱকজনৰ পিতৃক ৬ লাখ টকা দাবী কৰিছিল অপহৰণকাৰীয়ে ৷ এই ঘটনা সম্পৰ্কে লগে লগে বৰপেটা সদৰ থানাত এজাহাৰ দাখিল কৰে অপহৃত যুৱকজনৰ পিতৃয়ে ৷ লগে লগে এই ঘটনাৰ তদন্ত আৰম্ভ কৰি বৰপেটা সদৰ থানাৰ আৰক্ষী উপ-পৰিদৰ্শক মুক্তাজুৰ ৰহমানৰ নেতৃত্বত যোৱা আৰক্ষীয়ে চেঙা সমষ্টিৰ ঔমুৰা গাঁৱত অভিযান চলাই অপহৃত যুৱকজনক উদ্ধাৰ কৰিবলৈ সক্ষম হয় ৷