বন্ধন বেংকৰ ঋণ পৰিশোধৰ বাবেই থপিয়ালে পথচাৰীৰ বেগ !!

বৰপেটা ৰোডৰ ইউকো বেংকৰ কৰ্মচাৰীক লুট চিলনী চোৰৰ ৷ বন্ধন বেংকৰ ঋণ পৰিশোধ কৰিবলৈ বৰপেটা ৰোডৰ ইউকো বেংকত কাম কৰা মহিলাৰ বেগ টানি ৰঙাঘৰৰ আলহী হ’ল চিলনী চোৰ ৷

বৰপেটা, 29 অক্টোবৰ: বৰপেটা ৰোডৰ ইউকো বেংকৰ কৰ্মচাৰী জোৎস্না দাসক লুট চিলনী চোৰৰ ৷ মহিলাগৰাকীয়ে বেংকত নিজ কৰ্তব্য সমাপন কৰি সন্ধিয়া ফৰেষ্ট কলনিৰ পথেৰে খোজকাঢ়ি ঘৰলৈ গৈ আহি থকা সময়তেই মহিলাগৰাকীৰ বেগ টানি উধাও হয় দুই চিলনী চোৰে ৷ অৱশ্যে পিচত বৰপেটা ৰোড আৰক্ষীয়ে এটা চিলনী চোৰক কৰায়ত্ত কৰিবলৈ সক্ষম হয় যদিও এজন বৰ্তমানলৈকে পলাতক ৷ আটকাধীন চিলনী চোৰটোৰ নাম হৈছে ওলা বসুমতাৰী ৷ আৰক্ষীৰ জেৰাত হাউলীৰ হাতীজানাৰ অকণ বসুমতাৰীৰ পুত্ৰ ওলা বসুমতাৰীয়ে কয়, 30 নৱেম্বৰত বন্ধন বেংকৰ পৰা লোৱা ঋণৰ কিস্তি আদায় দিবৰ বাবেই এই চুৰি কাৰ্য সংঘটিত কৰে ৷ এখন নম্বৰ প্লেট বিহীন স্কুটিৰে মঙলবাৰে বৰপেটা ৰোডত এজন সতীৰ্থৰ সৈতে এই কাৰ্য সংঘটিত কৰে ওলা বসুমতাৰী নামৰ যুৱকজনে ৷

উল্লেখ্য যে, দুই বছৰ পূৰ্বে বন্ধন বেংকৰ পৰা দুই লাখ টকাৰ ঋণ লৈছিল চিলনী চোৰ ওলা বসুমতাৰীয়ে ৷ এবছৰে ঋণৰ কিস্তিৰ ধন পৰিশোধ কৰিছে যদিও বুধবাৰে বন্ধন বেংকৰ কিস্তিৰ ধন আদায় দিয়াৰ আছিল অন্তিম সময়সীমা ৷

ভুক্তভোগী মহিলাগৰাকীৰ ভাষ্য অনুসৰি বেগটোত আছিল মুঠ সাত হাজাৰ টকা ৷ বৰ্তমান আৰক্ষীয়ে আটকাধীন চিলনী চোৰটোৰ পৰা মাত্ৰ এহাজাৰ টকা উদ্ধাৰ কৰিবলৈ সক্ষম হৈছে ৷ বাকী ছয় হাজাৰ টকা আনটো চিলনী চোৰে লৈ উধাও হয় ৷ ঘটনা সম্পৰ্কত মহিলাগৰাকীয়ে বৰপেটাৰোড আৰক্ষীচকীত এখন এজাহাৰ দাখিল কৰিছে ৷ আৰক্ষীয়ে তদন্ত অব্যাহত ৰাখিছে যদিও আনজন চিলনী চোৰক বৰ্তমানলৈকে আটক কৰিবলৈ সক্ষম হোৱা নাই ৷

• লগতে চাওক- আন্তঃৰাষ্ট্ৰীয় পৰ্যায়ত উজলিল হোজাইৰ ছামাদ লস্কৰ