পথৰ ওপৰতে ৰাইজে ভাঙিলে বিলাসী বাহন

শওঁপুৰত মটৰ চাইকেলত খুন্দা মৰাক কেন্দ্ৰ কৰি কলগাছিয়াত উত্তপ্ত পৰিস্থিতি । ছাইফুল ইছলাম নামৰ এজন গাড়ী চালকে নিজ গাড়ীৰে আব্দুল মালেক নামৰ এজন যুৱকৰ মটৰ ছাইকেলত খুন্দা মৰাৰ অভিযোগ । উত্তেজিত ৰাইজে ভাঙি তচনচ কৰিলে ছাইফুলৰ চাৰিচকীয়া বাহন ।

জনিয়া, 2 ছেপ্টেম্বৰ : কলগাছিয়া আৰক্ষী থানাৰ অন্তৰ্গত শওঁপুৰত বৃহস্পতিবাৰে আবেলি শওঁপুৰ গাঁৱৰে ছাইফুল ইছলাম নামৰ এজন গাড়ী চালকে কলগাছিয়াৰ আব্দুল মালেক নামৰ এজন যুৱকৰ মটৰ চাইকেল খুন্দা মৰাৰ অভিযোগ উত্থাপিত হৈছে । প্ৰাপ্ত অভিযোগ মতে, খুন্দা মাৰিয়েই ছাইফুলে নিজৰ AS01BQ1109 নম্বৰৰ চাৰিচকীয়া বাহনেৰে তীব্ৰ বেগেৰে কলগাছিয়ালৈ আহে । পিচে পিচে বাইকত থকা মালেক আৰু তেওঁৰ ভাতৃয়ে ছাইফুলক আটক কৰিবলৈ খেদি আহে ।

পিছত কলগাছিয়াৰ বৰপেটা অসামৰিক চিকিৎসালয়ৰ সন্মুখত আন এখন গাড়ীত খুন্দা মৰাত ছাইফুলে নিজৰ চাৰিচকীয়া বাহন পথৰ ওপৰত থৈ পলায়ন কৰে বুলি জানিব পৰা গৈছে । উত্তেজিত ৰাইজে ছাইফুলৰ চাৰিচকীয়া বাহনখন ভাঙি লণ্ডভণ্ড কৰাৰ লগতে কিছু সময় পিছতে চিকিৎসালয়ৰ ভিতৰত লুকাই থকা ছাইফুলক ধৰি কলগাছিয়া আৰক্ষী থানাত গতাই দিয়ে বুলি জানিব পৰা গৈছে ।

উল্লেখ্য যে, কিছুদিন পূৰ্বে ছাইফুল ইছলামৰ অনৈতিক কাৰ্যৰ ভিডিঅ’ ভাইৰেল হৈছিল । যাৰ ফলত ছাইফুল ইছলাম নামৰ গাড়ীৰ চালকটোৱে ডেৰ লাখ টকা জৰিমনা দিব লগা হৈছিল । মালেকৰ বাবেই ডেৰ লাখ টকা জৰিমানা দিব লগীয়া হোৱা ছাইফুলে তেওঁৰ বাহনেৰে মালেকক খুন্দা মৰা বুলি মালেকৰ খুড়াকে জানিবলৈ দিয়ে । এই ক্ষেত্ৰত তদন্তৰ জড়িয়তে ছাইফুলৰ উচিত শাস্তিৰ দাবী কৰিছে মালেকৰ লগতে মালেকৰ আত্মীয়ই । এই ঘটনাকলৈ কলগাছিয়াত তীব্ৰ চাঞ্চল্যৰ সৃষ্টি কৰিছে ।

লগতে পঢ়ক :জেলত থকা স্বামীক ড্ৰাগছ দিবলৈ আহি আটক পত্নী