নখান্দা নৈত জাঁপ দিলে যুৱকে

নিশা দলঙৰ পৰা নখান্দা নৈত জাঁপ দিলে যুৱকে ৷ যুৱকজন বৰপেটা চহৰৰ বৃন্দাবনহাটীৰ হৰকুমাৰ দাস ৷ যুৱকজনৰ সন্ধানত বৰ্তমানেও আৰম্ভ হোৱা নাই উদ্ধাৰ অভিযান ৷

বৰপেটা, ২৪ জুলাইঃ বৰপেটাত মঙলবাৰে নিশা দলঙৰ পৰা নখান্দা নৈত জাঁপ দিলে যুৱকে ৷ যুৱকজন বৰপেটা চহৰৰ বৃন্দাবনহাটীৰ প্ৰসন্ন দাসৰ পুত্ৰ হৰকুমাৰ দাস ৷ মঙলবাৰে নিশা প্ৰায় ১১ বজাত পাটবাউসীৰ ওচৰৰ নখান্দা নৈৰ দলঙৰ পৰা জাঁপ দিয়ে যুৱকজনে ৷ ইতিমধ্যে দলঙৰ ওপৰত উদ্ধাৰ কৰা হৈছে যুৱকজনৰ AS 15 K 3917 নম্বৰৰ বাইকখনৰ লগতে যুৱকজনে পিন্ধি যোৱা চেণ্ডেলযোৰ ৷ নিশা নৈত মাছ মাৰি থকা মাছমৰীয়াই প্ৰত্যক্ষ কৰিছিল যুৱকজনে জপিওৱাৰ দৃশ্য ৷ ইপিনে যুৱকজনৰ সন্ধানত বৰ্তমানেও আৰম্ভ হোৱা নাই উদ্ধাৰ অভিযান ৷ SDRF আৰু NDRF বাহিনীৰ জোৱানসকল সম্প্ৰতি বজালী মহকুমাৰ বানত আৱদ্ধ লোকক উদ্ধাৰ অভিযানত ব্যস্ত হৈ থকাৰ বাবেই যুৱকজনৰ সন্ধানত চলাব পৰা নাই উদ্ধাৰ অভিযান ৷

ইপিনে আত্মহত্যাৰ পূৰ্বে যুৱকজনে লিখি থৈ যোৱা এখন চুইছাইড নোট উদ্ধাৰ কৰিছে আৰক্ষীয়ে ৷ অৱশ্যে চুইছাইড নোটত যুৱকজনে আত্মহত্যাৰ বাবে কাকো জগৰীয়া কৰি থৈ যোৱা নাই বুলি জানিবলৈ দিছে আৰক্ষীয়ে ৷ যুৱকজনে আত্মহত্যা কৰা এই ঘটনাক লৈ বৰপেটাত অব্যাহত আছে চাঞ্চল্য ৷ কিন্তু কি কাৰণত যুৱকজনে আত্মহত্যা কৰিলে সেইয়া এতিয়াও জানিব পৰা হোৱা নাই ৷