বৰপেটাৰ অসম কেশৰী জাতীয় বিদ্যালয়ৰ ৰূপালী জয়ন্তী, বৰ্ণিল সাংস্কৃতিক শোভাযাত্ৰা

Asom Keshori Jatiya Vidyalaya : বৰপেটাৰ অসম কেশৰী জাতীয় বিদ্যালয়ে সম্পূৰ্ণ কৰিলে গৌৰৱোজ্জল 25 বছৰ ৷ বিদ্যালয়খনৰ ৰূপালী জয়ন্তী উপলক্ষে শুকুৰবাৰে বাহিৰ কৰা হয় এক বিশাল সাংস্কৃতিক শোভাযাত্ৰা ৷

বৰপেটা, 19 জানুৱাৰী : ইংৰাজী মাধ্যমৰ বিদ্যালয়ৰ পৰিৱৰ্তে মাতৃভাষা অসমীয়াত গুণগত শিক্ষা প্ৰদানৰ উদ্দেশ্যে সত্ৰনগৰী বৰপেটাত অসম কেশৰী অম্বিকাগিৰি ৰায়চৌধুৰীৰ স্মৃতিত স্থাপন কৰা অসম কেশৰী জাতীয় বিদ্যালয়ে সম্পূৰ্ণ কৰিলে গৌৰৱোজ্জল 25 বছৰ ৷ বিদ্যালয়খনৰ 25 বছৰ সম্পূৰ্ণ হোৱাৰ উপলক্ষে বৰ্ণাঢ্য কাৰ্যসূচীৰে উদযাপন কৰিছে ৰূপালী জয়ন্তী ৷ তিনিদিনীয়া কাৰ্যসূচীৰে উলহ-মালহেৰে উদযাপন কৰিছে বিদ্যালয়খনৰ ৰূপালী জয়ন্তী ৷

1997 চনতে বৰপেটাৰ সচেতন গণ মঞ্চৰ উদ্যোগত স্থাপিত জাতীয় বিদ্যালয়খনৰ ৰূপালী জয়ন্তী উপলক্ষে শুকুৰবাৰে বাহিৰ কৰা হয় এক বিশাল সাংস্কৃতিক শোভাযাত্ৰা ৷ তিনিদিনীয়া কাৰ্যসূচীৰে উদযাপন কৰা ৰূপালী জয়ন্তীৰ সাংস্কৃতিক শোভাযাত্ৰাত হাতীৰে সৈতে সত্ৰীয়া গায়ন-বায়ন, বিভিন্ন জনগোষ্ঠীয় নৃত্য-গীত, অসমীয়া সমাজৰ লোক পৰম্পৰা আৰু লোক নৃত্য, গীত-পদ আদিৰে বৰ্তমান অধ্যয়ন কৰি থকা ছাত্ৰ-ছাত্ৰীসকলৰ লগতে প্ৰাক্তন ছাত্ৰ-ছাত্ৰীসকলেও অংশগ্ৰহণ কৰা পৰিলক্ষিত হয় ৷

বিশাল সাংস্কৃতিক শোভাযাত্ৰাটোৱে সমগ্ৰ সত্ৰনগৰী বৰপেটা পৰিভ্ৰমণ কৰাৰ সময়ত শোভাযাত্ৰাত উজলি উঠা অসমৰ লোক কলা-সংস্কৃতিয়ে সত্ৰনগৰীবাসীক মুগ্ধ কৰি তোলে ৷ সৰুক্ষেত্ৰীৰ প্ৰাক্তন বিধায়ক ডাঃ তাৰা প্ৰসাদ দাসে উদ্বোধন কৰা সাংস্কৃতিক শোভাযাত্ৰাত চহৰখনৰ কেবাগৰাকীও বিশিষ্ট লোকে অংশ লয় ৷ উল্লেখ্য যে, অসমীয়া মাধ্যমৰ এই বিদ্যালয়খনে বিগত সময়ছোৱাত বৰপেটাত শৈক্ষিক ক্ষেত্ৰত উল্লেখনীয় স্থান অধিকাৰ কৰিবলৈ সক্ষম হৈছে ৷

1997 চনতে প্ৰতিষ্ঠা কৰা এই বিদ্যালয়খন প্ৰথমতে এটা ভাৰাঘৰতে আৰম্ভ কৰা হৈছিল বুলি কয় উদযাপন সমিতিৰ বিষয়ববীয়াই ৷ পৰৱৰ্তী সময়ত সচেতন গণ মঞ্চৰ বিষয়ববীয়া তথা সদস্য আৰু ৰাইজৰ দান-বৰঙণি তথা প্ৰচেষ্টাত বিদ্যালয়খন আজিৰ পৰ্যায়ত উপনীত হৈছে বুলি কয় উদযাপন সমিতিৰ বিষয়ববীয়াই ৷

লগতে পঢ়ক :সদ্যঘোষিত অসম লোকসেৱা আয়োগৰ পৰীক্ষাত উজলিল কলগাছিয়াৰ দুই বোৱাৰী