গৰম বন্ধ খুলিল পিচে বন্ধ বিদ্যালয় !

গৰম বন্ধৰ পিছতে বৃহস্পতিবাৰৰ পৰা ৰাজ্যৰ বহু বিদ্যালয়ত আৰম্ভ কৰিব পৰা নাই পাঠদান , সাজু হৈ উঠা নাই বিদ্যালয়সমূহ ৷ এতিয়াও দুৰ্ভোগ ভুগি আছে বহু অঞ্চলৰ ৰাইজে ৷

বৰপেটা, 1 আগষ্টঃ সমগ্ৰ ৰাজ্যত বানপানীৰ তাণ্ডৱৰ পাছত বানপীড়িত অঞ্চলসমূহৰ অৱস্থা কিছু সুস্থিৰ হৈছে যদিও এতিয়াও দুৰ্ভোগ ভুগি থাকিব লগা হৈছে বহু অঞ্চলৰ ৰাইজে৷ ৰাজ্যৰ প্ৰায় সকলো বিদ্যালয়ত গৰম বন্ধৰ পিছতে বৃহস্পতিবাৰৰ পৰা ৰাজ্যৰ সকলো বিদ্যালয়ত আৰম্ভ হৈছে পাঠদান । কিন্তু বহু অঞ্চলত এতিয়াও সম্ভৱ হৈ উঠা নাই পাঠদান, সাজু হৈ উঠা নাই বিদ্যালয়সমূহ৷ কলগাছিয়াৰ ৬৬৭ নং খাটাকুছি প্ৰাথমিক বিদ্যালয় এতিয়াও জলমগ্ন ৷ ছাত্ৰ-ছাত্ৰী আৰু শিক্ষক-শিক্ষয়িত্ৰী বিদ্যালয়ত উপস্থিত হৈছিল যদিও শৈক্ষিক পৰিৱেশৰ অভাৱৰ বাবেই পাঠদান আৰম্ভ কৰিব নোৱাৰিলে ৷

অনুৰূপ ঘটনা হাইলাকান্দি জিলাতো ৷ বানপানীৰ বাবেই পাঠদান সম্ভৱপৰ নহ'ল হাইলাকান্দি জিলাৰ দুখন বিদ্যালয়ত। জিলাখনৰ হাইলাকান্দি শিক্ষা খণ্ডৰ অধীনৰ গোপাল ৰাম মধ্য ইংৰাজী বিদ্যালয় আৰু আঠালিপাৰ নিম্ন প্ৰাথমিক বিদ্যালয়ত আজি সম্ভব নহ'ল পাঠদান। বিদ্যালয় দুখনৰ কাষত থকা দুটা বাসগৃহত কাইলৈৰ পৰা পাঠদান হব বুলি জনাইছে হাইলাকান্দিৰ প্ৰাথমিক শিক্ষা বিষয়া ইকবাল হুচেইনে। এইসকল ছাত্ৰ-ছাত্ৰীৰ ভৱিষ্যতকলৈ এতিয়া চিন্তিত অভিভাৱকসকল।