বাঘবৰত প্ৰধানমন্ত্ৰী গ্ৰাম চড়ক যোজনাত অনিয়মৰ অভিযোগ

বৰপেটাৰ বাঘবৰ সমষ্টিৰ অন্তৰ্গত প্ৰধানমন্ত্ৰী গ্ৰাম চড়ক যোজনাৰ পথ নিৰ্মাণৰ কামত সংঘটিত হৈছে ব্যাপক অনিয়ম । টাকা'কাটাৰ পৰা জাউৰীমাৰীলৈ যোৱা পথ নিৰ্মাণত ব্যাপক অনিয়ম সংঘটিত হোৱাৰ অভিযোগত আমছু আৰু ৰাইজে সাব্যস্ত কৰে প্ৰতিবাদ ।

জনীয়া,29 এপ্ৰিল: বৰপেটাৰ বাঘবৰ সমষ্টিৰ অন্তৰ্গত প্ৰধানমন্ত্ৰী গ্ৰাম চড়ক যোজনাৰ পথ নিৰ্মাণৰ কামত সংঘটিত হৈছে ব্যাপক অনিয়ম । এই অভিযোগ উত্থাপন কৰিছে অঞ্চলটোৰ স্থানীয় ৰাইজৰ লগতে সোণাবাৰী আঞ্চলিক আমছু‌ৱে ।

উল্লেখ্য যে, অভিযোগ অনুসৰি সমষ্টিটোৰ টাকা'কাটাৰ পৰা জাউৰীমাৰীলৈ যোৱা প্ৰায় ২০ কোটি টকা ব্যয়েৰে নিৰ্মাণ কৰা পথচোৱা চৰকাৰী সকলো‌ নিয়ম উলংঘা কৰি ঠিকাদাৰ ফজল হকে চলাই আছে ব্যাপক দুৰ্নীতি । শিল কমকৈ ব্যৱহাৰ কৰাত লগতে স্থানীয়ভাৱে পোৱা ব্ৰহ্মপুত্ৰৰ বালি এই নিৰ্মাণ কাৰ্যত ব্যৱহাৰ কৰিছিল ঠিকাদাৰ গৰাকীয়ে ৷ যাৰ ফলত এসপ্তাহৰ ভিতৰতে পকী পিটচৰ মাজে মাজে গজি উঠিছে ঘাঁহ । কেৱল ঘাঁহ গজাই নহয়, চপৰা-চপৰে খহিছে নৱনিৰ্মিত পকী পথচোৱা ৷

বাঘবৰ সমষ্টিত প্ৰধান মন্ত্ৰী গ্ৰাম চড়ক যোজনাত অনিয়ম

পথচোৱাৰ নিৰ্মাণৰ বিসংগতিৰ বাবে স্থানীয় ৰাইজে ক্ষোভ প্ৰকাশ কৰিছে । পথ নিৰ্মাণত গাফিলতি কৰাৰ অভিযোগত ৰাইজে ঠিকাদাৰ গৰাকীৰ বিৰুদ্ধে বিভিন্ন শ্ল’গানেৰে সাব্যস্ত কৰে উত্তাল প্ৰতিবাদ । লগতে সমষ্টিৰ পথ নিৰ্মাণত অনিয়ম সংঘটিত কৰাত ঠিকাদাৰ আৰু বিষয়া গৰাকীৰ বিৰুদ্ধে কঠোৰ শাস্তিমূলক ব্যৱস্থা গ্ৰহণ কৰিবলৈ স্থানীয় ৰাইজৰ লগতে দল-সংগঠনে সংশ্লিষ্ট বিভাগৰ ঊৰ্ধতম কৰ্তৃপক্ষৰ লগতে গড়কাপ্তানী মন্ত্ৰী গৰাকীক দাবী জনায় ।

লগতে পঢ়ক:বঙাইগাঁৱৰ গোলাপাৰাত জব্দ কাঠফলা মিল