বৰপেটা, ৯ চেপ্তেম্বৰ: ৰাজ্য চৰকাৰৰ ২৬ হাজাৰ চাকৰিত নিয়োগৰ বাবে অনুষ্ঠিত কৰা পৰীক্ষাত ৰাজ্যৰ প্ৰায় ১৩ লাখ নিবনুৱাই অংশ লৈছিল ৷ ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই নিয়োগ প্ৰক্ৰিয়া(Assam direct recruitment) অতি স্বচ্ছ আৰু নিকা হ’ব বুলি বাৰে বাৰে ঘোষণা কৰাৰ লগতে পৰীক্ষাৰ সময়ত ইন্টাৰনেট সেৱা পৰ্যন্ত কৰ্তন কৰিছিল ৷ উপযুক্ত প্ৰাৰ্থীয়ে যাতে চাকৰি লাভ কৰিব পাৰে তাৰ বাবে চৰকাৰে দিয়া প্ৰতিশ্ৰুতি বিশ্বাস কৰিছিল অসমবাসীয়ে ৷
শেহতীয়াকী চাকৰিৰ নামত একাংশই ধন সংগ্ৰহ কৰাৰ লগেতে প্ৰাক্তন বিধায়কো এই কাৰ্যত জড়িত থকা বুলি বুলি ভিক্টৰ দাস নামৰ এজন লোকে সামাজিক মাধ্যমযোগে (Victor Das tweet on govt recruitment) অভিযোগ উত্থাপন কৰিছে (Money laundering allegation on Assam recruitment) ৷ ইয়াৰ পাছতেই সাধাৰণ জনতাৰ মনত সংশয়ৰ সৃষ্টি হোৱাৰ লগতে সমগ্ৰ বিষয়টো সন্দেহৰ আৱৰ্তত সোমাই পৰিছে ৷ চাকৰিৰ নামত ধন সংগ্ৰহ কৰা বিষয়টোক লৈ ইতিমধ্যে গোচৰো ৰুজু হৈছে ৷
নিযুক্ত পৰীক্ষাত ধনৰ লেন-দেনৰ অভিযোগৰ পাছতে ৰাজ্য চৰকাৰৰ স্থিতিক লৈ প্ৰশ্নৰ উত্থাপন কৰিছে ভিন্নজনে ৷ এই পৰ্যন্ত বিষয়টোক লৈ তদন্ত ঘোষণা নোহোৱাক লৈও ক্ষোভ উজাৰিছে প্ৰাৰ্থীৰ লগতে দল-সংগঠনে ৷ চাকৰিৰ নামত ধন সংগ্ৰহৰ বিষয়টোক লৈ ৰাজ্যবাসীৰ মাজত সৃষ্টি হৈ থকা সন্দেহৰ মাজতে এগৰাকী চাকৰি প্ৰাৰ্থীয়ে প্ৰশ্ন কৰিছে যে, পৰীক্ষাত অনৈতিক কাৰ্য সংঘটিত কৰিলে পিঠি ফালি দিম বুলি কোৱা ৰাজ্যৰ আৰক্ষীৰ সঞ্চালক প্ৰধানে চাকৰিৰ নামত ধন সংগ্ৰহ কৰাসকলৰ পিঠি ফালিবলৈ কি ব্যৱস্থা হাতত ল’ব ?