HSLC পৰীক্ষাত জনীয়া সমষ্টিত সৰ্বোচ্চ নম্বৰ লাভ কৰা আলিমুল ইছলাম আলহাদিক লৈ ৰেলী

মঙলবাৰে ঘোষণা হ'ল হাইস্কুল শিক্ষান্ত আৰু হাইমাদ্ৰাছা পৰীক্ষাৰ ফলাফল(HSLC results 2022) । ফলাফলত জিলিকিল বহুকেইজন । ৰাজ্যৰ বিভিন্ন প্ৰান্তৰ বিদ্যালয়ত বৈছে আনন্দৰ ঢল । কলগাছিয়াত এখন বিদ্যালয়ে সৰ্বোচ্চ নম্বৰ লাভ কৰা ছাত্ৰ-ছাত্ৰীক লগত লৈ উলিয়ালে ৰেলী ।

জনীয়া,৯ জুন:মঙলবাৰে ঘোষণা হোৱা হাইস্কুল শিক্ষান্ত আৰু হাইমাদ্ৰাছা পৰীক্ষাৰ ফলাফলে হাঁহি বিৰিঙালে বহুতৰে মুখত(HSLC results 2022) । সমান্তৰালভাৱে বৰপেটা জিলাতো বহুকেইজন মেধাবী ছাত্ৰ-ছাত্ৰীয়ে গৌৰৱ কঢ়িয়ালে বহুকেইখন বিদ্যালয়লৈ । একেদৰে কলগাছিয়াৰ ব্যক্তিগত শিক্ষানুষ্ঠান কলগাছিয়া পাব্লিক স্কুলৰ ছাত্ৰ আলিমুল ইছলাম আলহাদিয়ে জনীয়া সমষ্টিৰ ভিতৰতে সৰ্বোচ্চ নম্বৰ লাভ কৰি কঢ়িয়ালে গৌৰৱ ।

ছাত্ৰগৰাকীক লৈ উৎফুল্লিত হৈ পৰিছে বিদ্যালয় কৰ্তৃপক্ষৰ লগতে ছাত্ৰ-ছাত্ৰীসকলো । আলিমুল ইছলাম আলহাদিয়ে লাভ কৰে ৯৬.৫% শতাংশ নম্বৰ । কেৱল আলহাদিয়েই নহয় কলগাছিয়া পাব্লিক স্কুলে লাভ কৰে ৫ টা ডিষ্টিংশ্বন আৰু ৪ টা ষ্টাৰ ।

যাৰ পৰিপ্ৰেক্ষিতত বৃহস্পতিবাৰে বিদ্যালয়খনৰ শিক্ষক-শিক্ষয়ত্ৰী আৰু ছাত্ৰ-ছাত্ৰীয়ে কলগাছিয়া পাব্লিক স্কুলৰ পৰা নৱজ্যোতি মহাবিদ্যালয় হৈ ছাত্ৰ-ছাত্ৰীক এই অঞ্চলৰ ৰাইজক পৰিচয় কৰাই দিয়াৰ বাবে এখন ৰেলী উলিয়াই । পৰৱৰ্তী বৰ্ষসমূহতো এই ধাৰা অক্ষুন্ন থাকিব বুলি বিদ্যালয়খনৰ পৰিচালক আব্দুল বাৰেক খানে জানিবলৈ দিয়ে ।

উল্লেখ্য যে মঙলবাৰে ঘোষণা কৰা হাইস্কুল শিক্ষান্ত পৰীক্ষাৰ ফলাফলত মুঠ ৫৬.৪৯ শতাংশ পৰীক্ষাৰ্থী উত্তীৰ্ণ হৈছে । আনহাতে হাইমাদ্ৰাছা পৰীক্ষাৰ ফলাফলত উত্তীৰ্ণৰ হাৰ হৈছে ৫৪.৭৩ শতাংশ । এইবাৰ হাইস্কুল শিক্ষান্ত আৰু হাইমাদ্ৰাছা পৰীক্ষাৰ মুঠ শিক্ষাৰ্থীৰ সংখ্যা আছিল ৪,৩১,১৩২ গৰাকী ।

ইয়াৰে হাইস্কুল শিক্ষান্ত পৰীক্ষাত অৱতীৰ্ণ হৈছিল মুঠ ৪,০৫,৫৮২ গৰাকী পৰীক্ষাৰ্থী আৰু উত্তীৰ্ণ হয় ২,২৯,১৩১ গৰাকী । আনহাতে, পৰীক্ষাত অৱতীৰ্ণ হোৱা ১,৮৮,৫৭০ জন ছাত্রৰ ভিতৰত উত্তীৰ্ণ হয় ১,১০,৮৮৮ জন আৰু ২,১৭,০১২ গৰাকী ছাত্রীৰ ভিতৰত উত্তীৰ্ণ হয় ১,১৮,২৪৩ গৰাকী । ছাত্রৰ উত্তীৰ্ণৰ হাৰ ৫৮.৮০ শতাংশ আৰু ছাত্রীৰ উত্তীৰ্ণৰ হাৰ ৫৪.৪৯ শতাংশ (Total pass rate in HSLC exam 2022)।

লগতে পঢ়ক:নতুন ৰূপত মন্ত্ৰীসভাঃ কোনে পালে কি দপ্তৰ