নেদেখাজনৰ আশীষ বিচাৰি বৰপেটা সত্ৰত কুইন ওজা

ভোটাৰৰ ভোটেই দিল্লীযাত্ৰাৰ একমাত্ৰ সাৰথি নহয় নিৰ্বাচনী প্ৰাৰ্থীৰ ৷ ভোটৰ লগতে লাগিব পৰম কৰুণাময় ঈশ্বৰৰো আশীৰ্বাদ ৷ সেয়ে ঈশ্বৰৰ আশীৰ্বাদ প্ৰাপ্তিৰ উদ্দেশ্যৰে দেওবাৰে পুৱাই দ্বিতীয় বৈকুন্ঠপুৰী হিচাপে প্ৰসিদ্ধ বৰপেটা সত্ৰত উপস্থিত হয় গুৱাহাটী লোকসভা সমষ্টিৰ বিজেপি প্ৰাৰ্থী কুইন ওজা ৷ যদিও গুৱাহাটী সমষ্টিত বৰপেটা জিলাৰ কোনো সমষ্টি অন্তৰ্ভুক্ত নহয় বা বৰপেটাত নাই কোনো ভোটাৰ, তথাপি বৰপেটাৰ বোৱাৰী হিচাপে সত্ৰৰ প্ৰতি থকা শ্ৰদ্ধা আৰু গুৰু দুজনাৰ আশীৰ্বাদ কামনাৰে আজি বিজেপি প্ৰাৰ্থী কুইন ওজাই বৰপেটা সত্ৰত উপস্থিত হৈ সেৱা জনায় ৷ সত্ৰত আশীষ লোৱাৰ সময়ত সত্ৰৰ বুঢ়াসত্ৰীয়া বশিষ্ঠ শৰ্মা আৰু ডেকা সত্ৰীয়া নৱজিৎ দাসও উপস্থিত থাকে সত্ৰত ৷ দুয়োজনা গুৰু আৰু সত্ৰৰ সত্ৰাধিকাৰৰ আশীষ লৈ গুৱাহাটী লোকসভা সমষ্টিৰ বিজেপি প্ৰাৰ্থী কুইন ওজাই বৰপেটাৰ বোৱাৰী হিচাপে নিজৰ স্মৃতি ৰোমন্থন কৰে ৷

বৰপেটা, ৩১ মাৰ্চঃ বিজেপি প্ৰাৰ্থীগৰাকীৰ মতে, ঈশ্বৰৰ আশীৰ্বাদ নহ’লে কোনো কাৰ্যত সফল হ’ব নোৱাৰে ৷ আনহাতে ঈশ্বৰৰ আশীৰ্বাদ পালে তেওঁ জয়ী হ’ব বুলিও মন্তব্য কৰে ৷ ভাৰতীয় জনতা পাৰ্টি অধিক শক্তিশালী আৰু সংগঠিত হোৱা বিপৰীতে কংগ্ৰেছৰ ভেটি এতি়য়া বিধস্ত বুলি ব্যক্ত কৰে প্ৰাৰ্থী গৰাকীয়ে ৷ নিৰ্বাচনত বিজেপি দল আৰু মোডী ডাঙৰীয়াৰ জয় হ’ব বুলি মন্তব্য কৰে গুৱাহাটীৰ বিজেপি প্ৰাৰ্থীগৰাকীয়ে ৷ আনহাতে বিজেপি দল হাৱাত চলা নাই বুলিও মন্তব্য কৰে কুইন ওজাই ৷