Barpeta SP press conference : বহিঃৰাজ্যৰ পৰা অসমত নিয়ন্ত্ৰণ হৈছে পিএফআই-চিএফআইৰ কাম-কাজ

PFI আৰু CFI নেতাক গ্ৰেপ্তাৰক কেন্দ্ৰ কৰি বৰপেটা জিলাৰ আৰক্ষী অধীক্ষক অমিতাভ সিনহাৰ সংবাদমেল ৷ আজি বৰপেটা মুখ্য ন্যায়িক দণ্ডাধীশৰ আদালতত হাজিৰ কৰা হ’ব PFI আৰু CFI নেতাক ৷

বৰপেটা, 8 এপ্ৰিল : PFI আৰু CFIৰ তিনি শীৰ্ষ নেতাৰ গ্ৰেপ্তাৰ সন্দৰ্ভত বৰপেটা জিলাৰ আৰক্ষী অধীক্ষক অমিতাভ সিনহাই আয়োজন কৰে সংবাদমেলৰ ৷ বৃহস্পতিবাৰে বৰপেটাৰোড ৰে’ল ষ্টেচনত বৰপেটা জিলাৰ আৰক্ষী অধীক্ষক অমিতাভ সিনহাৰ নেতৃত্বত গ্ৰেপ্তাৰ কৰা হয় PFI আৰু CFI ৰ এই শীৰ্ষ নেতাকেইগৰাকীক । গ্ৰেপ্তাৰ কৰা CFI আৰু PFI নেতা কেইগৰাকী হ'ল - জাহিদুল ইছলাম, জাকিৰ হুছেইন আৰু আবু ছামা (Two PFI leaders arrested) ৷

জাহিদুল ইছলাম CFI ৰ ৰাষ্ট্ৰীয় সমিতিৰ কোষাধ্যক্ষ তথা অসম ৰাজ্যিক সমিতিৰ সভাপতি বুলি সদৰী কৰিছে আৰক্ষীয়ে ৷ CFI নেতা জাহিদুল ইছলামৰ ঘৰ বাক্সাৰ গোৱৰ্ধনাৰ সনবাৰী গাঁৱত ৷ আনহাতে PFIৰ ৰাজ্যিক সম্পাদক জাকিৰ হুছেইনৰ ঘৰ বাক্সাৰ গোৱৰ্ধনা গাঁৱত ৷ PFI ৰ ৰাজ্যিক সভাপতি আবু চামাৰ ঘৰ বৰপেটা ৰোডৰ ৯ নং ৱাৰ্ডত বুলি আৰক্ষী অধীক্ষকগৰাকীয়ে সংবাদমেলত উল্লেখ কৰে (Barpeta SP press conference) ৷

আৰক্ষীয়ে ধৃত PFI আৰু CFI নেতা দুজনৰ পৰা নগদ ডেৰ লাখ টকাৰ লগতে বেংকৰ নথি আৰু আন কেতবোৰ সামগ্ৰী জব্দ কৰিবলৈ সক্ষম হৈছে ৷ আৰক্ষী অধীক্ষকগৰাকীয়ে জানিবলৈ দিয়া মতে, ৰাজ্যত এতিয়াও অব্যাহত আছে নিষিদ্ধ ঘোষিত PFI ৰ সাংগঠনিক তৎপৰতা ৷ বহিঃৰাজ্যত বাহৰ পাতি অসমৰ দুই শীৰ্ষ PFI আৰু CFI নেতাই চলাই গৈছিল সাংগঠনিক কাম কাজ ৷ অসমৰ পৰা পলাই গৈ দীৰ্ঘদিন দেশৰ ভিন্ন ৰাজ্যত PFI আৰু CFI নেতাকেইজনে আত্মগোপন কৰি আছিল বুলি সংবাদ মেলত উল্লেখ কৰে (Operation against Popular Front of India) ৷

দিল্লীৰ পৰা ৰে’লযোগে অসমত প্ৰৱেশৰ পিচতে বৰপেটাৰোড ৰে’লৱে ষ্টেচনত অভিযান চলাই PFI আৰু CFIৰ নেতা দুজনৰ লগতে সম্প্ৰতি জামিনত থকা PFI ৰ সভাপতি আবু ছামাক গ্ৰেপ্তাৰ কৰে আৰক্ষীয়ে ৷ দিল্লীৰ পৰা গোপনে অসমত প্ৰৱেশ কৰা জাকিৰ হুছেইন আৰু জাহিদুল ইছলামক বৰপেটা ৰোড ৰে’লৱে ষ্টেচনৰ পৰা গোপন স্থানলৈ লৈ যোৱাৰ পৰিকল্পনা কৰিছিল PFI নেতা আবু ছামাই ৷ আৰক্ষী অধীক্ষকগৰাকীয়ে জনোৱা মতে দীৰ্ঘদিন ধৰি এই দুই শীৰ্ষ PFI আৰু CFI নেতাৰ বিৰুদ্ধে আৰক্ষীয়ে অব্যাহত ৰাখিছিল অভিযান (Raids against PFI in Assam) ৷

আজি তিনি PFI আৰু CFI নেতাক বৰপেটা মুখ্য ন্যায়িক দণ্ডাধীশৰ আদালতত হাজিৰ কৰা হ’ব ৷ অৱশ্যে আৰক্ষীয়ে তিনি শীৰ্ষ নেতাক আৰক্ষীৰ জিম্মাত বিচাৰি আদালতত আবেদন জনাব বুলি উল্লেখ কৰে ৷

লগতে পঢ়ক:CJI comments on humanity : আইনত থাকিব লাগে মানৱতাৰ স্পৰ্শ: মুখ্য ন্যায়াধীশ