পথৰ মাজত জাল লৈ মন্ত্ৰী হিমন্তৰ বিৰুদ্ধে প্ৰতিবাদ

গড়কাপ্তানি মন্ত্ৰী হিমন্ত বিশ্ব শৰ্মাৰ বিৰুদ্ধে ৰাইজৰ অভিনৱ প্ৰতিবাদ ৷ বৰপেটাৰ বৰভিঠা বজাৰৰ পৰা আপৰূপী বৰতাৰী সংযোগী পথটো দীৰ্ঘ দিনে জৰাজীৰ্ণ হৈ থকাত যাতায়াতৰ বাবে এতিয়া হাহাকাৰ পৰিস্থিতিৰ সৃষ্টি হৈছে সমগ্ৰ অঞ্চলৰ ৰাইজৰ ৷ অতি শীঘ্ৰে মেৰামতি কৰি দিবলৈ বিভাগীয় কৰ্তৃপক্ষৰ লগতে চৰকাৰক আহ্বান জনাইছে প্ৰতিবাদকাৰী সকলে ৷

জনীয়া, 25 জুনঃবৰপেটা জিলাৰ জনীয়া সমষ্টিৰ অন্তৰ্গত বৰভিঠাৰ বিধ্বস্ত পথে জলা কলা খুৱাইছে অঞ্চলটোৰ ৰাইজক ৷ যাৰ বাবে অতিষ্ঠ হৈ স্থানীয় ৰাইজৰ লগতে জিলা সংখ্যালঘু ছাত্ৰ সন্থাৰ সদস্য সকলে তীব্ৰ প্ৰতিবাদ সাব্যস্ত কৰে ৷ উক্ত পথটোত দীৰ্ঘ দিনে প্ৰকাণ্ড-প্ৰকাণ্ড পুখুৰী সদৃশ গাঁতৰ সৃষ্টি হোৱাত যাতায়াতৰ বাবে এতিয়া জলা-কলা খাবলগীয়া পৰিস্থিতিৰ সৃষ্টি হৈছে ৰাইজে ৷

বৰপেটা জিলাৰ জনীয়া সমষ্টিৰ অন্তৰ্গত বৰভিঠা গাঁও পঞ্চায়তৰ এলেকাৰ বৰভিঠা বজাৰৰ পৰা আপৰূপী বৰতাৰীলৈ সংযোগী পথটো এতিয়া জৰাজীৰ্ণ অৱস্থা ৷ উক্ত পথটো মাজত সৃষ্টি হোৱা পুখুৰী সদৃশ গাঁতবোৰৰ বাবে ইতিমধ্যে দৈনিক দুৰ্ঘটনা সংঘটিত হৈ আহিছে । আনকি এজাক বৰষুণ দিলেই স্কুললৈ যোৱাৰ ক্ষেত্ৰত যমৰ-যাতনা ভুগিবলগীয়া হৈছে অঞ্চলটোৰ ছাত্ৰ-ছাত্ৰী সকল । উক্ত ঘটনাত ক্ষুব্ধ হৈ বৰপেটা জিলা সংখ্যা লঘু ছাত্ৰ সন্থাৰ লগতে স্থানীয় ৰাইজে পথটোত সৃষ্টি হোৱা গাঁতত জাল মাৰি অভিনৱ প্ৰতিবাদ সাব্যস্ত কৰে ৷

আনহাতে, বৰ্তমানৰ বৰপেটা লোকসভা সমষ্টিৰ সাংসদ আব্দুল খালেক আৰু জনীয়া সমষ্টিৰ বিধায়ক ডঃ হাফিজ ৰফিকুল ইছলামক ৰাইজে পথটো মেৰামতি কৰি দিবলৈ দীৰ্ঘ দিনৰ পৰাই আহ্বান জনাইছিল ৷ কিন্তু ৰাইজৰ আহ্বানৰ প্ৰতি কোনো গুৰুত্ব নিদিয়া বুলি অভিযোগ কৰে স্থানীয় ৰাইজৰ লগতে সংগঠনটোৰ সদস্য সকলে ৷ তাৰোপৰি গড়কাপ্তানি মন্ত্ৰী হিমন্ত বিশ্ব শৰ্মাৰ লগতে বিভাগীয় কৰ্তৃপক্ষক অতিশীঘ্ৰে পথটো মেৰামতি কৰি যাতায়াতৰ বাবে সু ব্যৱস্থা কৰি দিবলৈ আহ্বান জনাইছে সংখ্যালঘু ছাত্ৰ সন্থাৰ বিষয়ববীয়াৰ লগতে স্থানীয় ৰাইজে ৷ আনহাতে উক্ত পথটো যদি সাত দিনৰ ভিতৰত মেৰামতি নকৰে তেনেহলে তীব্ৰ গণ আন্দোলন গঢ়ি তোলাৰ হুংকাৰ প্ৰদান কৰিছে সংগঠনটোৰ সদস্য সকলে ৷

লগতে পঢ়ক- গুৱাহাটীত বিপদসীমাৰ ওপৰেৰে বৈছে ব্ৰহ্মপুত্ৰৰ পানী