গৰু চিণ্ডিকেটৰ মূল মাফিয়া খাইৰুল ইছলামৰ বাসগৃহত আৰক্ষীৰ তালাচী

গৰু চিণ্ডিকেট চক্ৰৰ মূল মাফিয়া খাইৰুল ইছলামৰ বাসগৃহত আৰক্ষীৰ তালাচী ৷ বৰপেটাৰ হাউলী চহৰৰ নিজ বাসগৃহত হাউলী আৰক্ষীৰ অভিযান ৷ অবশ্যে এই অভিযানৰ সময়ত সাংবাদিকক ভিতৰত প্ৰবেশৰ অনুমতি দিয়া নাই আৰক্ষীয়ে ৷

বৰপেটা, 30 মে': শুকুৰবাৰে নিশা হাউলী আৰক্ষীয়ে গ্ৰেপ্তাৰ কৰে গো মাফিয়া খাইৰুল ইছলামক ৷ শনিবাৰে বৰপেটাৰ মুখ্য ন্যায়িক দণ্ডাধীশৰ আদালতত হাজিৰ কৰাই ৫ দিনৰ আৰক্ষী জিম্মাত গ্ৰহণ কৰিছিল খাইৰুল ইছলামক ৷ শুকুৰবাৰৰ পৰা তিনিদিন ধৰি চলা জেৰাৰ অন্তত গো মাফিয়াজনক লগত লৈ হাউলী আৰক্ষীয়ে তেওঁৰ নিজ বাসগৃহত আৰম্ভ কৰিছে তালাচী অভিযান ৷

উল্লেখ্য যে, বাঘবৰৰ কংগ্ৰেছ বিধায়ক দিলদাৰ ৰেজ্জা গৃহ বিভাগৰ সংসদীয় সচিব হিচাপে দায়িত্ব গ্ৰহণৰ সময়ৰ পৰাই খাইৰুল ইছলামে বিভিন্ন পক্ষক মেনেজ কৰি কাঠ, কয়লা, চাউলৰ লগতে গৰুৰ চিণ্ডিকেট চলাই আহিছিল ৷ মূলতঃ ৰাজ্যৰ পৰা বাংলাদেশলৈ চোৰাংভাৱে গৰু সৰবৰাহৰ মূল নায়ক হিচাপে পৰিচিত খাইৰুল ইছলামে বিগত সময়ত বিভিন্ন স্থানত নামে বেনামে অগাধ সম্পত্তিৰ মালিক হৈ পৰিছিল ৷ হাউলী চহৰৰ মাজমজিয়াত প্ৰাসাদোপম অট্টালিকাৰ লগতে ৰাজ্যৰ বিভিন্ন স্থানত তেওঁ সম্পত্তিৰ পাহাৰ গঢ়ি তোলা বুলি ৰাইজে অভিযোগ তুলি আহিছে ৷

খাইৰুল ইছলামক লগত লৈ দেওবাৰে হাউলী থানাৰ ভাৰপ্ৰাপ্ত বিষয়া অভিজিত বৰুৱাৰ নেতৃত্বত প্ৰায় আঢ়ৈ ঘন্টা ধৰি তালাচী চলায় ৷ তালাচীৰ সময়ত গৰু মাফিয়াজনৰ বাসভৱনৰ পৰা কোনো আপত্তিজনক সামগ্ৰী বা নথিপত্ৰ জব্দ কৰিলে নেকি সেই বিষয়ে আৰক্ষীয়ে মুখ খোলা নাই ৷

তদন্তৰ স্বাৰ্থত এতিয়াই কোনো কথা প্ৰকাশ কৰিব বিচৰা নাই বুলি সাংবাদিকক জানিবলৈ দিছে হাউলী থানাৰ ভাৰপ্ৰাপ্ত বিষয়াই ৷ ইপিনে অজস্ৰ ধন সম্পত্তিৰ গৰাকী খাইৰুল ইছলামে যাতে মেনেজ কৰি সাৰি যাব নোৱাৰে সেই সম্পৰ্কে ৰাইজে তীক্ষ্ণ নজৰ ৰাখিছে ৷

লগতে পঢ়ক :বিদ্যুৎ উপ সংমণ্ডলৰ কাণ্ডই চিন্তিত কৰি তুলিছে নাওবৈচাবাসীক